La Usc di Ladins

N gröm é stades les manifestaziuns sportives che an á messü desdí iniann por gauja dl "coronavirus": ponsun ala Maratona dles Dolomites, ponsun ala Hero, ponsun ala Transalp y tan d’atres. Cun la situaziun che s’apajâ bel plan ia n’él sté de chi che á impó orü la vaghé, sciöche i organisadus dla "KronplatzKing MTB Marathon", gara cun roda da munt cun start a Al Plan y travert sön Plan de Corones.
Le termin ê fissé por en domënia ai 30 d’agost y te chisc ultims mëisc á döt le team incër le chef dl’organisaziun Maurizio Kastlunger albü n gran dafá por arjigné ca percursc y suradöt ince por adaté la gara ales desposiziuns cuntra le Covid. Ala fin á l’evënt impó messü gní desdit – nia por le Covid – mo por le rî tëmp. Bele en jöbia ai 27 d’agost â la Proteziun Zivila dé fora n avis de rî tëmp, che valô dal vëndres al lönesc. La gauja ê che an s’aspetâ de gran prezipitaziuns, che é spo belavisa gnüdes en gran abondanza.
I organisadus á reagí te n pröm vare, ascortan le percurs de gara, por evité p.ej. da fá jí i concorënc olache al foss sté prigo da eghes, lapró án sposté le start de n’ora plü tert. Ciamó la domënia da doman adora ê i volontars söl post al start por arjigné ca cina al ultim detail. Indere éra jüda atramënter. Do les 7 da doman ál indó metü man da plovëi dassënn, lapró él gnü n gran temporal, che s’á lascé aldí a Al Plan cun na saita sön ciampaní, y les eghes á danejé pert dl percurs. La gara á messü gní desdita.
Sot la comunicaziun dada tres Facebook ciafon por i organisadus la gran maioranza de complimënc y respet por la dezijiun. D’atri n’â indere daldöt nia ion che ai â paié ite, ê gnüs da dalunc adalerch por la gara y n’á nia podü la fá. Nos un tut sö contat cun Maurizio Kastlunger, por le damané sce al s’ess aspeté na te’ situaziun, ciodí che an á aspeté cina al ultim momënt por desdí, sce an ti jará adincuntra ai concorënc y ince ci che al se tol para da chësta situaziun.

La intervista ciafëise t’La Usc di Ladins di 4 de setëmber   (pablo)