La Usc di Ladins

»Apuntament ai 6 de jené, canche la situazion playoff sarà più chièra. Una ladina sarà te le Final Four, resta da capir coluna. Fascia o Cortina?«, scrivaane dantangern.

Pèsca Tofènia é passèda e, descheche se se fegurèa, la situazion playoff la é stata stabilida: Cortina te la Final Four, Fascia fora.

Chest chel che à dezidù la roda de partides stata apontin angern, canche su la giaces del campionat de Alps se à dejout ence i match anter Renon contra Cortina e Vipiteno contra Fascia.

La doi squadres ladines se jièa apontin a distanza l’azess ai playoff de IHL-Serie A, col Fascia che cognea recuperèr ponts sui jormegn de Ampez, ma coscita no la é stata. L’é stat enveze la squadra veneta a se vadagnèr definitivamenter l’azess a le Final Four de gra a na venta neta sui sudtiroleres del Renon, 4 a 0 a l’Olimpich. I ampezegn à desfrutà l prum shutout sajonèl del portier Marco De Filippo per se portèr a cèsa venta e calificazion, adertura da terza en classifica de gra al despas en classifica apontin sul Renon. L prum gol de la partida l’é ruà tel secondo temp con l vantac ampezan de gra a na fortunèda deviazion aversaria sot porta. Amò te la seconda frazion de jech la dopieta de Phil Pietroniro à defat serà la partida. L quarto temp ge à dat legreza ence al solit Remy Giftopoulos che à serà l resultat sul 4 a nia.

Endèna che l Cortina batea l Renon, su la giacia del Weihenstephan Arena l Fascia sutèa te la neva teneta di sudtiroleres del Vipiteno. Dò la desfata ai shootout ruèda al scola 48 ores dant, te la neva endesfida l Fascia se à troà amò n’outa en parità a la fin di tempes regolamentères. I Falcons, amò orfegn de Roland Hofer e chest’outa ence de Marco Defrancesco, i à metù su la giacia l nef defensor Gregorio Gios, joen de Asiago che à jià sia ultima sajons tel Busan. I goi é rué demò tel secondo temp, col vantac fascian de Tedesco e la responeta firmèda Gander, e tel terzo, canche i doi jiadores é endò doenté protagonisć: instouta vantac sudtiroler con Gander e responèta fascèna con Tedesco. 2 a 2, fin di tempes regolamentères e overtime che ge à dat rejon al Wipptal con Gooch. Fascia definitivamenter 5° en classifica te la IHL. Nia Final Four, ades l cogn se conzentrèr sui playoff de AHL.

Etres resultac: ai 6 de jené l’é stat jià fora ence Migross Supermercati Asiago Hockey vs HDD SIJ Acroni Jesenice (3-0), EC Die Adler Stadtwerke Kitzbühel vs HC Pustertal Wölfe (2-3, OT) e HC Gherdëina vs HK SZ Ljubljana (0-5). La terza ladina, l Gherdena, era jà fora dai jeghes per la Final Four e l’à bele cognù zeder ence contra la seconda forza del campionat de Alps.

Proscima roda de partides en sabeda ai 9 de jené.



Con foto: Daniel Tedesco à segnà 2 goi (Foto de Doriano Brunel)  (Daniele Verra)