La Usc di Ladins

L’é stat doi dis de garejèdes de slalom strent tel fin de setemèna passà a Flachau (Austria), sul portoi Hermann Maier per recuperèr i apuntamenc anulé per coronavirus a Wengen e a Kitzbuehel,

En sabeda ai 16 pruma venta per l’atlet de cèsa Manuel Feller, che col mior temp te la seconda manche l’à despassà l franzous Clement Noel, mior te la pruma manche e a la fin sul secondo sciaier del podie dedant a n auter atlet de cèsa, Marco Schwarz. Al 4° post l norvegeis Sebastian Foss-Solevaag, che l dì dò l’é stat bon de se vadagnèr l sciaier più aut, dedant da Schwarz e dal franzous Alexis Pinturault.

Nesciun resultat strepitous per i taliegn: la sabeda Alex Vinatzer l’é jit fora amò al scomez de la pruma manche, proan a comedèr n fal sui prumes palec. Fora ence Liberatore, Sala e Razzoli. Stefano Gross, peà via col numer 28, l’é ruà 11° te la pruma manche, e con el a se califichèr l’é stat demò Manfred Moelgg; ampò te la seconda manche Manny l’é sutà e Sabo l’à perdù posizions ruan a la fin 19°, ampò l mior e soul a ponts de duc i taliegn.

L dì dò la é jita mingol miec per la squadra talièna, con 5 califiché dò la pruma manche. L mior l’era Simon Maurberger (15°) sobito dant da Stefano Gross (16°) e dapò Manfred Moelgg (20°) duc te n pugn de centeisemes. Te la Top 30 enceGiuliano Razzoli e Alex Vinatzer, che dò esser jit fora trei outes te l’ultima garejèdes l’à proà a vegnir jù con maor prudenza, ruan giusta a se califichèr. Nia da fèrenveze per Sala e Liberatore e fora Tonetti.

Te la seconda manche Alex à proà a recuperèr, ma ampò no l’é stat bon de portèr fin junsom la bona proa che l’era dò a fèr. N moment no sorì per l joen de Gherdena, che ampò con si 21 egn l’à amò l met de fèr esperienza e troèr la mesura e la conzentrazion per moscèr sia valuta.

La mior proa te la seconda manche l’é stat chela de Moelgg, che l’é stat bon de recuperèr set posizion ruan a la fin al 13° post, mior di taliegn, e de despassèr Gross, che l’à mingol perdù junsom l portoi ruan en ultima 16°. Ponts vadagné ence per Razzoli, che à mingol zedù seran 21°, fora enveze te la seconda Maurberger. I doi “veterans” ladins no i é stac proprio deldut contenc de sia prestazion, che ampò la moscia che i pel amò dir la sia te chesta sajon de slalom olache la batalia é dassen senestra, e i pel ence vardèr con fiduzia al mondièi de Ampez.

La maor sodesfazions per la squadra talièna rua te chest moment da la eles: na gran Marta Bassino se à vadagnà l sciaier più aut del podie de slalom lèrch tant en sabeda che en domenia su la Podkoren3 de Kranjska Gora, despassan ence na Mikaela Shiffrin ezelenta la domenia te la pruma manche. La taliènes à portà a cèsa de etres bogn recultac: en sabeda 5° post per Federica Brignone, 15° per Sofia Goggia e 16° per Elena Curtoni; en domenia 7° post per la Goggia e dapò al 23°, 24° e 25° post Roberta Midali, Elena Curtoni e Roberta Melesi: dassen n bon ejit per la does Roberta, peèdes via col numer 50 e 48.

Speton donca de veder Marta Bassino, che la vif n moment de grazia che ge à fat concostèr ben 400 ponts te la classifica de spezialità, ensema a la compagnes te la garejèdes de slalom lèrch e de libera en program te Fascia sul portoi La VolatA de Sèn Pelegrin dai 26 ai 28 de firé.

 (Lucia Gross)