La categorìes mendres del Fascia va inant delvers, con bon jech e resultac.
Paussa l Fascia, ma demò te la Alps Hockey League, olache a fèr marevea l’é ruà la gran neva de la separazion de la strèdes anter Joseph Mizzi e Falcons. La categorìes mendres é jites inant enveze regolarmenter te desvaliva categorìes.
I Falcons U 13 venc l derby ai rigores Dò la bona venta sul Trent e na setemèna de arcedamenc, la formazion vidèda da coach Lazzer à jià l’endesfida con l Valdiefiemme JTH su la giacia del Scola ai 30 de jené. Per la pruma outa, ajache no pel esser publich te stadie, la partida é stata ence manèda fora co na direta su la piata facebook ufizièla di Falcons. La partida no à sparagnà emozions, con i Falcons bogn de jir en vantac tel prum temp dant de
encassèr aboncont l gol de l’1 a 1. Partida averta donca, con i fascegn che someèa aer l met de dèr vèlch de più. L secondo temp ge à dit defat delvers a Rasom e compagnes, bogn de se portèr endò inant per doi outes, segnan dant l 2 a 1, amò n’outa anulà dai aversaries col gol del 2 a 2, e dapodò con doi goi che à portà enveze l’endesfida sul 4 a 2. L terzo temp se à avert coscita col vantac fascian, ma l Valdifiemme se à fat troèr vertech su la giacia, no se lascian sciampèr l’ocajion de se portèr amò en parità con doi goi. I tempes regolamentères se à serà coscita sul 4 a 4, con l derby dezidù ai shootout. I rigores ge à dat tinultima rejon al Fascia, en gol con Thobias Cinzol e Daniel Locatin, ence de gra a la parèdes de Lorenzo Crepaz che se à lascià despassèr demò n’outa.
Su La Usc stampèda di 5 de firé sarà da poder lejer resultac e mingol de cronaca ence de la formazions U.15, U.17 e U.19 de l'Hockey Fascia Falcons. (Daniele Verra)
