La Usc di Ladins

Program confermà, dai 9 ai 14 de firé, per i Campionac Mondièi Juniores e Under 23 de schi nordich (paslonch, saut dal trampolin, combinèda). A la manifestazion, metuda a jir duc i invergn da 44 egn en cà per endrez de la F.I.S., tolarà pèrt ence la nazionèla juniores de paslonch con vint joegn: nef per la categorìa Under 23 (sie omegn e trei femenes) e undesc per la categorìa Under 20 (cinch fenc e sie touses).

La garejèdes de saut dal trampolin e de combinèda nordica les vegn envièdes via a Lahti, sul trampolin SalpausselkäHS100; cheles de paslonch, enveze a Vuokatti, paìsc de la region de Kianuu, logà jù a beleche 600 km a nord de Helsinki.

L calandèr taca via en mèrtesc ai 9 de firé con la sprint a tecnica classica e de seghit co la competizions su la distanzes di 5, 10 e 15 km; en sabeda ai 14 sarà la stafetes e, per fenir en domenia ai 15 la doi garejèdes longes, 30 km per i omegn e 15 per la femenes.

La delegazion la proarà a confermèr i resultac de nonzech de la ultima edizion iridèda, stata a Oberwiesenthal, te la Sassonia, olache la sodesfazions no les é de segur mencèdes.