La Usc di Ladins

A La Thuile, tla Val d'Aosta, él sté en domënia ai 7 de forá »Skimo for Young«, na gara de Copa Talia de schi alpinism por les categories plü jones. Les categories Under 23, Under 20, Under 18 y Under 16 á garejé por concuisté punc importanc por la classifica nazionala. En gara êl spo ince i plü jogn, dles categories U12 y U14, che á garejé a titul promozional. Sambëgn á ince chëstes gares messü gní desfirades a portes stlütes, por respeté les leges y les restriziuns cuntra la pandemia. La gara é gnüda organisada dal schi club Corrado Gex de Arvier y deplü atlec de Badiasport á tut pert ala competiziun. L'atleta da La Ila, Elisa Aricó, á fat dër n bun resultat, se plazan al secundo post tla categoria U14. Chisc é i atri plazamënc de sü compagns de scuadra: categoria U16 feminil Hanna Irsara 8., Annalisa Pitscheider 9.; categoria U16 maschil Manuel Nagler 23., Tobias Tasser 24.; categoria U18 feminil Mara Sottara 14.; categoria U20 maschil Giordan Nagler 21.  (kp)