La Usc di Ladins

A Lahti tla Finlandia mëtel śën man i Campiunac dl Mond Juniores dla disciplines nordiches, che durerà nchin ai 12 de fauré 2021.

Cumbinazion nordica
Tla cumbinazion nordica vën trëi dla cater mutans dala valedes ladines. Puderon udëi garejé la doi atletes de Gherdëina Daniela Dejori y Lena Prinoth deberieda cun Annika Sieff dl Skicollege de Fascia, l'autra atleta dla scuadra taliana ie Greta Pinzani.
Pra i mutons jëuni iel Iacopo Bortolas dl Skicollege de Fascia, Domenico Mariotti y Stefano Radovan.
La garejedes: l provisoria competition round ie bele sun l program ncuei merdi 9 de fauré. Per la bedaies mundieles garejerà la mutans duman mierculdi ai 10 de fauré dal saut HS100 y te 5 km de pudejé. N juebia ti tucheràla ai mutons de s'la fé ora te na Gundersen da 10 km.  N vënderdi ai 12 de fauré iel mo sun l program al garejeda a scuadres mescededes.

Saut cun i schi
Chëst iede ie la plu jëuna dla surans Malsiner de Gherdëina leprò pra i Mundiei Junior. Jessica Malsiner ie dessegur la favorita dla scuadra taliana per n bon resultat, deberieda cun ëila iel mo unì cherdà ite Martina Ambrosi y Martina Zanitzer.
Pra i mutons ons i doi jëuni de Gherdëina Mattia Galiani y Daniel Moroder, che s'la fajerà ora per i cater posć da garat tla garejedes desferëntes cun i autri atlec dla scuadra taliana Giovanni Bresadola, Francesco Cecon y Andrea Campregher.
La garejedes: la mutans garejea n mierculdi ai 10 de fauré dal saut HS100 de Vuokatti, i mutons n juebia ai 11 de fauré. Per stlù ju iel n vënderdi ai 12 de fauré mo la garejedes a scuadres sibe di mutons che dla mutans.

Pudejé
Pra la garejedes de pudejé iel nce la categuria Under 23, ulache l ie nce l atlet de Moena Giovanni Ticò che fej pea, ntan che tla Under 20 iel Alessandro Chiocchetti nce ël de Moena.
Cherdei ite tla scuadra taliana di ëi y dl'ëiles ie mo unic, tla U23 Martina Di Centa (Carabinieri), Chiara De Zolt (Carabinieri), Nicole Monsorno (Fiamme Gialle), Martin Coradazzi (Esercito), Stefano Dellagiacoma (Carabinieri), Michele Gasperi (Esercito), Davide Graz (Fiamme Gialle), Simone Mocellini (Fiamme Gialle) y tla U20 Lucia Isonni (SC Schilpario), Sara Hutter (aggr. Fiamme Oro), Veronica Silvestri (SC Livigno), Iris De Martin Pinter (aggr. Carabinieri), Nadine Laurent (SC Gressoney), Anna Rossi (Carabinieri) y i mutons Nicolò Cusini (SC Livigno), Elia Barp (Fiamme Gialle), Luca Sclisizzo (Esercito) y Fabio Longo (aggr. Fiamme Oro).