La Usc di Ladins

Chisc dis él a Laas les ultimes döes gares de copa dl monn de liösa sön pista naturala. Incö mertesc él sté la pröma, che á odü la devënta de Patrick Pigneter y Florian Clara. Por i campiuns da Völs y Lungiarü él la cuarta devënta sön 5 gares, cun chëra che ai s’á assiguré na gara dan la fin süa 12. Copa dl Monn.
Te chësc podest da Laas nen éra jüda de püc centejims. Pigneter y Clara á taié le travert cun le tëmp de 1.06,87, y á insciö salvé n vantaje de 8 centejims sön i campiuns d’Europa, i südtirolesc Patrick y Matthias Lambacher. Ma dui centejims dedô vëgnel bele i terzi – i rusci Aleksandr Egorov y Petr Popov.
Cun chësta devënta é Pigneter y Clara a ce dl tlassamënt general cun 485 punc, che é avisa 100 punc dan i Lambacher. Terzi é i austriacs Fabian y Simon Achenrainer cun 335 punc.
Patrick Pigneter á mostré gran ligrëza por la enejima copa de cristal: "La 12. devënta generala é veramënter speziala. Chësc mostra che i sun ince do tan d’agn ciamó de livel mondial. Pla finala da en mercui podunse sëgn garejé lediamënter."
Avisa, la ultima gara de copa dl monn che sará indoman mercui, tres a Laas, sará por i dui campiuns ma plü la ocajiun da incoroné la sajun cun n ater gran resultat. A d’ëi les mius congratulaziuns.  (pablo)