La Usc di Ladins

Cun n saut de 80 metri, che ti à valù 92.3 ponc, à Daniela pudù pië via sciche 12ejima tla garejeda de pudejé. Ti 5 km sun i schi strënc ie Daniela stata bona de fé l cuarto miëur tëmp, s'la fajon ora te n "fotofinish" cun la iapaneja Miyazaki Ayane y la russa Mariia Kuzmina. Daniela ie passeda la rissa dl travert avisa un n secunt do la iapaneja, ma mé un n centejim de secunt dan la russa, che à perauter fat l miëur tëmp tl pudejé, stlujan ju nsci al 6. post.   
Annika Sieff dla Fiamme Oro de Moena, fova segonda do l saut (88 metri, 107.1 ponc), ma ie tla garejeda de pudejé nia stata bona de tenì l var cun la miëures. Danz che la speranzes de ruvé pra na bedaia fova grandes do l saut, purempò ie l 9. plazamënt for n bel resultat pra na tel cumpetizion.
Lena Prinoth de Urtijëi che ie l prim iede leprò pra i Campiunac dl Mond, ie stata bona de se miuré de un n plazamënt do l saut (76 m, 79.1 ponc) y ie ruveda dal 21ejim inant al 20ejim plazamënt finel.
L medemo vel per Greta Pinzani dl SC Monti Lussari, 29ejima do l saut (72,5 m, 68.6 ponc) àla stlut ju al 28ejim post.
Venciù la bedaia d'or di Mundiei Junior 2021 à Gyda Westvold Hansen (NOR), che cun n saut da 117.8 ponc (92 m) se ova bele iló metù danora y ie resteda for dancà.
La bedaia d'arjënt ti ie jita a Marte Leinan Lund, nce ëila dla Norvegia, che fova mo cuarta do l saut (88,5 m, 105.9 ponc). Lisa Hirner dl'Austria, setima do l saut (84,5 m, 98.8 ponc) à venciù la bedaia de bront.