La Usc di Ladins

Miec de nsci ne ëssi nia pudù finé via i Mundiei per i jëuni dla scuadra taliana, che à venciù ncuei vënderdi ai 12 de fauré, la bedaia de bront tla cumpetizion a scuadres.
Pra la garejeda de saut à Iacopo Bortolas y Annika Sieff fat scialdi na bona garejeda, cun respetivamenter l terzo y l segondo miëur saut de si grupa. Ma nce Daniela Dejori y Domenico Mariotti à purtà na bona prestazion, tant che i ie stai tan boni da se mëter tla cuarto pusizion cun 102.9 ponc, do l Iapan cun 103.5, ma dan la Germania cun 99.5 ponc. Danora fova la Norvegia (113 ponc) y l’Austria (112.7 ponc) y l fova nsci bele tan che tler che per l’autra scuadres se tratòvela mé plu dla bedaia de bront.
Defati se àla tla garejeda de pudejé propi tratà danter chëla trëi scuadres. Iacopo Bortolas ie bën stat bon de ti jì dant al iapanesc, ma l ie stat l tudësch a ruvé sciche terzo te travert. Annika Sieff se à laurà inant tla terza posizion, Daniela Dejori ie stata bona de tenì la destanza dala tudëscia y Domenico Mariotti à mo fat na boniscima garejeda cun l terzo tëmp de chëla frazion, se seguran nsci l terzo plazamënt y cun chësc la bedaia de bront mundiela per si scuadra. I tudësc ie cun na desferënzia de 1,6 secunc ruvei cuarti.

1. Norvegia   41:29.1
2. Austria    +00:04.0
3. Talia.       +00:52.0
4. Germania +00:53.6
5. Iapan       +01:40.6
6. USA        +03:08.7
7. Finlandia +03:37.8
8. Slovenia  +04:50.2
9. Ruscia    +04:53.4
10. Cechia    +06:04.1

Tla garejeda ndividuela de cumbinazion nordica di ëi, stata inier juebia ai 11 de fauré se ova Stefano Radovan tlassificà al 22ejim, Domenico Mariotti al 23ejim y Iacopo Bortolas al 26ejim post.
Dantier, pra l’ëiles fova Daniela Dejori sesta y Annika Sieff nona.

FOTO: FISI