AHL, prumes verdec

Data

04 de merz 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L campionat che tol ite la ladines l scomenza a dèr sie prumes resultac en vista di playoff.


En sabeda ai 27 de firé se à jià na giornèda completa de campionat, con duta la squadres su la giacia. Na pievia de goi e emozions, ma ence resultac che à dat i prumes verdec, con l’Olimpija Ljubljana che se à vadagnà per pruma l’azess matematich ai chèrc de finèla di playoff te l’endesfida venta 4 a 0 de contra al Bregenzerwald. Endesfida d’auta classifica chela anter i campions taliegn de l’Asiago e l Jesenice, con la venta di slovens ruèda a l’overtime che arvejina ence i Red Steelers ai playoff, coscita desche l Pusteria venjidor per 4 a 2 a Klagenfurt.

Pruma trei piazes beleche congelèdes donca, con na batalia che resta enveze averta per l quarto post (ultim post bon per l’azess diret ai chèrc de finèla) ocupà per endèna dal desfat Asiago a quota 53 ponts. Dò di venec se troa defat l Salzburg a quota 52, batù a l’overtime dal Renon, e l Cortina a quota 51. La squadra de Ampez l’à profità defat de chesta dopia desfata per se portèr sot a si aversaries, de gra a la bela venta per 6 a 1 col Linz, ultima de la clasc.

Per chel che vèrda l’autra doi ladines enveze, no se pel pissèr ai prumes cater posć, ma piutost a n piazament anter la 5^ e la 12^ piaza, che ge dajessa l met de jièr la fasa de pre-playoff e pontèr amò en aut.

De più su la partides de la squadres ladines su La Usc stampèda de vender ai 5 de mèrz.   (Daniele Verra)