Zingerle y Gross é campiuns talians

Data

23 de merz 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Pro i campionac nazionai assoluc a Livigno á l'atlet badiot davagné le slalom lerch, baton le vize campiun dl monn De Aliprandini. Stefano Gross á concuisté l'or tl slalom
Hannes Zingerle, atlet da La Ila, s'â bele lascé odëi cun süa davënta tla gara de Copa Europa, en jöbia ai 18 de merz a Reiteralm, tl'Austria. Süa buna condiziun ál spo ince ciamó desmostré tratan i campionac nazionai assoluc de schi, a Livigno dai 22 ai 24 de merz. Zingerle á davagné inier le slalom lerch y s'á insciö confermé por le secundo iade campiun talian: bele dl 2019 a Cortina âl davagné la medaia d'or. Al secundo post s'á plazé Luca De Aliprandini, vize campiun dl monn y al terzo post é rové Daniele Sorio. I atri atlec ladins che á tut pert ala competiziun á porté a ciasa chisc resultac: Tobias Kastlunger 12., Matteo Canins 13. y Alex Zingerle 19. 

Sabo davagna le slalom
Incö, mertesc, êl sön le program le slalom strënt. Stefano Gross, nia massa contënt de süa sajun te Copa dl Monn, se l'á fata avarëi sön la nëi de Livigno. Al ê bele pröm do la pröma manche y tla secunda ál mantigní le vantaje se plazan dan Riccardo Tonetti. Al terzo post é rová, cun le medemo tëmp, Tommaso Sala y Alex Vinatzer. Manfred Mölgg é tomé fora tla pröma manche, mo ti pröms diesc él rové d'atri atlec ladins: 6. Matteo Canins, 7. Hannes Zingerle y 8. Tobias Kastlunger (9. a livel de gara FIS, cun l'austriach Gramshammer apëna dan l'atlet marou).

Brignone davagna le slalom
Le slalom dles ëres é gnü davagné da Federica Brignone. Tla pröma manche ê pröma Vivien Insam, atleta da Sëlva, che é tla finada rovada al terzo post, se plazan do Vera Tschurtschenthaler.  (kp)