La Usc di Ladins

Deplü é i atlec de Badiasport che á tut pert ala »Transcavallo«, gara tradizionala de scialpinism che s'á desfiré en sabeda ai 20 de merz tl raiun da munt dl Alpago y de Piancavallo. La gara, che é rovada a süa 38ejima ediziun, é gnüda organisada tl respet dles normatives anti coronavirus, sciöche porater dötes les gares y les competiziuns che é gnüdes fates tratan chësta sajun. Tla categoria »Mix« á davagné la copia metüda adöm da Melanie y Nicolas Ploner, fre y so. Lois Craffonara é rové al 12ejim post tla categoria »Senior«. Tles gares individuales á i atlec de Badiasport ince porté a ciasa de bugn resultac: Andreas Irsara á davagné tla categoria »Master« maschila, tla categoria »Master« feminila é Veronika Pedevilla rovada al secundo post. De bugn plazamënc ince por Mike Trebo y Robert Rottonara che s'á plazé al cuinto y al sesto post.  (kp)