La Usc di Ladins

En sabeda ai 3 de oril Verona ge à dat alberch a la Verona MTB International, garejèda de roda da mont pèrt del zircuit Italia Bike Cup. Duc i ziclisć no se à lascià sciampèr l’ocajion te chest temp de pecia proes a cauja del virus e i se à dat apuntament da les 9 dadoman con la desvalives categorìes vertie a pontèr via.

L percors pervedea l start e l travert tel parch de la Colombare, con single traks sparpagné su dut l percors lonch 4 chilometres con 150 metres de dislivel positif, da corer sessaben più outes a seconda de la categorìa.

A tor pèrt a la proa anter i Master 1 l fascian Gabriele Depaul, con si colores ormai solic del team SpaceBikes. Depaul l’à dat vita a na performance maraveousa che ge à consegnà l prum post de categorìa, medaa de or col temp de 1h02’59” per serèr la 5 rondes pervedudes per i M1.

En classifica ence l più joen fascian Mattias Rosso de l’US Litegosa che l’à tout pèrt a l’endesfida te la categorìa Open, se logan al 72° post assolut te la corsa venta dal talian Nadir Colledani te 1h30’31” (8 rondes), ruà dant de Mirko Tabacchi e Stephane Tempier. Rosso l’é a sie prum an anter i U.23 e per chest l’é partì con n numer aut, stentan a vadagnèr posizions te na classifica che veit le under joenes corer dessema ai atlec elite, enveze che esser spartides a na vida che fajessa sutèr fora i reèi valores di atlec più joegn.  (Daniele Verra)