Lubiana, secondo titol AHL

Data

01 de mei 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’Asiago di frèdes Marchetti batù en finèla dai slovens che jiarà l’an che vegn en IceHL. Se speta na crescimonia de la squadra ladines en Alps.

I playoff l’é n’autra storia, ma no semper. Te l’hockey l’é scialdi stat coscita, che l campionat l se spartesc te doi fases, chela de regular season e chela di playoff. Na spartijon de calandèr e organisazion, segur, ma ence na spartijon tel jech, de energies e forzes, de segurezes e verdec, de possibilità de venjer o de mencèr l’obietif dò na sajon dominèda.

I playoff ensoma, l’é n’autra storia. I segna n tabelon bianch e i dèsc na neva oportunità, zenza che la pruma squadra, chela che comana la classifica da setemènes, la posse più esser segura de nia. L’é l bel de la fasa »da ite o fora«, chela che soscedea dubies te chi che fin a la dì dant no i n’aea e che dèsc enveza neva gaissa de ensomech a chi che magari de gra a un pont vadagnà te na sera de OverTime che someèa jir dut stort, i se troa endò a batalièr per l titol.

Hockey de sorpreises e marevees, mai banal, perché i playoff l’é n autra storia. E coscita, Lubiana-Asiago, la finèla de Alps Hockey League vegnùda fora da la semifinèles che à eliminà Lustenau e Jesenice, no podea esser na endesfida banala. I venec saea de poder dir la sia, i venec saea che i playoff l’é hockey de sorpreises e marevees e che i 83 ponts del Lubiana, de contra ai 68 conquisté dai śai e rosc, no i aea più nesciun valor. Demò doi formazions, demò un titol. E cinch partides per l’arjonjer.

En mèrtesc ai 20 se à jià la pruma de la partides »al miec de le 5« en Slovenia. L Lubiana aea defat l derit de scomenzèr a jièr te cèsa per merit de classifica. Na partida thriller, con l vantac sloven dò 44 seconc e i portieres che, da enlouta i era doventé protagonisć de na partida perfeta. Demò tel terzo temp, al menut 46, l 2 a 0 di draghes. Partida fenida? Fegurave. Via con la remonta maraveousa de l’Asiago, con gol al 50’ e te l’ultim menut de partida: 59:15 di 60 de jech, 2 a 2 e inant coi tempes suplementères. Eh, scì, i playoff l’é n’autra storia. Na storia che à aboncont śirà malamenter per la squadra talièna, con l gol a l’OverTime del capitan sloven Ziga Pance che à depent la net slovena del vert di draghes e portà la serie sul 1-0.

Hockey de sorpreises e marevees, mai banal, ma ence hockey de delujion e despiajer. Perché i playoff l’é dut n’autra storia, e n gol a l’ OverTime te na sera che someèa poder doventèr n ensomech, l’é bon de fèr jir dut stort.

Dut stort scì. En jebia ai 22 de oril al Hodegart l’é stat temp de gara-2. Gara-2 ai 22 é fenida 2 a 2.

De più de La Usc stampèda de en vender ai 30 de oril del 2021.  (Daniele Verra)