La Usc di Ladins

A Farra de Soligo (TV) en domenia ai 2 de mé l’é stat endò temp, dò l stop sforzà de l’an passà per Coronavirus, del Cross Country Tra le Torri, manifestazion de roda da mont ruèda a la 14^ edizion, seconda tapa de la Veneto Cup.

Schèji 600 i atlec enscinué su n percors dut nef e fat più senester a cajon del catif temp. La garejèda é stata venta da la Rudy Project che à portà sul sciaier più aut del podie tant Davide Toneatti anter i omegn che Giorgia Marchet anter la femenes.

Te la giornèda de pievia, resultat lumenous per Fascia, che con Gabriele Depaul l’à vadagnà la medaa de or te la categorìa Master1. L’atlet de Dèlba, chest an te na forma maraveousa, l’à vadagnà n auter gran resultat con na proa perfeta. Seran sù la cater rondes pervedudes per sia categorìa te 1h05’27”, l ladin del Team SpaceBikes l’à conquistà l prum post dedant a Nicolò Ferrazzo ruà con n destach adertura sora l menut.

L Fascia Bike al GF Terre del Sangiovese

Semper ai 2 de mé l’é stat ence la Granfondo Terre del Sangiovese, garejèda romagnola con start a Bertinoro che à vedù la partezipazion de Guido Cuzzato, atlet del Fascia Bike Racing Team. L’endesfida se à dejout su n percors asvelt, ma nia sorì per l fort vent e l teren tumech che à metù a la proa i zirca 500 atlec empegné. La ventes é states de Jacopo Billi te 1h38’18” e de Annabella Stropparo col temp de 1h50’40”.

L’atlet de la sociazion sportiva fascena, con l temp de 2h11’55” l se à logà enveze al 228° post, 22° te la categorìa M1, se dijan sodesfat a la fin de sia proa en remonta, con na condizion che cresc per l davegnir.

 (Daniele Verra)