EWS, su la pedies del 2019 per n nef suzess

Data

15 de jugn 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L’Enduro World Series farà endò tapa a Cianacei dò l suzess de la pruma edizion e la paussa per Covid.

Dò l Giro d’Italia che à tocà la valèdes ladines, l leam anter Fascia e la roda no l se ferma. Anzi, l dopia. Dant de la fin de jugn defat sarà te val l gran apuntament con l’Enduro World Series, competizion mondièla che farà tapa a Cianacei con doi proes, ai 23 e ai 26 del meis. No più roda da strèda, ma roda da mont donca, per n nef spetacol ai mascimes livie.

L’event l’era jà stat metù dant tel 2019 con n gran suzess, con dis de bel temp e gran moviment de jent e ziclisć te la strèdes del comun fascian, tant che jà tel 2020 se aessa volù ge dèr amò alberch a la manifestazion. Purampò l Covid aea anulà ogne tentatif e coscita ge à volù spetèr mingol de più, n an de paussa che à fat amò più grana la voa de gregn evenc e turism.

La competizion che rua te Fascia te chest 2021 sarà tel calandèr Enduro coi prumes doi round de la sajon del zircuit de garejèdes EWS. Na manifestazion sportiva de nonzech, voluda dai Sponsor Met Helmets (title sponsor, n.d.r), Dainese e Northwave e sostegnuda da l’Apt val de Fascia, azienda che à investì, soraldut ti ultimes egn, semper de più tel setor de la roda e che la é partner de chest projet enscin da canche l’é nasciù. Apede, chest an se à jontà ence Trentino Marketing che à volù tor pèrt a chesta ezelenza tel mond de la roda.

»L prozess che à tout ite ence Trentino Marketing te l’endrez de l’event EWS te Fascia – à dit l president del Comitat de Endrez Fassabike Wiliam Basilico - l’é per nos desche Comitat n gran recognosciment per l lurier dejout e che ne dèsc amò maor gaissa e fiduzia per l davegnir del setor de la roda te duta la val«.

No demò la doi proes reines de EWS te la setemèna de manifestazion, ma tel program ence l’EWS 100 e EWS 80, competizions che troarà lèrga en vender ai 25 sui medemi percorsc de la proes mondièles con n muie de atlec profescionisć che i no à vadagnà te la sajons passèdes assà ponts tel ranking per se jièr la competizion più auta. Jà duta la listes di atlec les é al complet te vigniuna de chesta proes, a desmostrazion de l’aut livel e de la gaissa per l’apuntament fascian. Amò pec dis, utoi ence a librèr i percorsc da la neif, e l’EWS a Cianacei sarà endò realtà.  (Daniele Verra)