Festa fascèna a la Bmw Hero Südtirol Dolomites

Data

17 de jugn 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La garejèda de Gherdenera à portà gran spetacol e gran legreza per Verra e Depaul.

Marevea. L’é semper marevea su la strèdes de la Bmw Hero, la garejèda de roda da mont endrezèda da Gherdena e che la toca la cater valèdes ladines entorn l Sela. Vedudes da spetacol, ma ence gran fadìa per i mile e mile ziclisć che vel esser eroes per na dì e i se dèsc jù erta dò erta per arjonjer i spic e se petèr jù per la pontaes tecniches di troes ladins.

Na edizion, chela del 2021 ruèda dò l stop per l Covid, che à portà n muie de neves, descheche podarede lejer ence tel bel articol de Bruno Maruca su La Usc de vender ai 18, ma che desche zenza no à trat endò su l’emozion, che la é ruèda forta a duc i partezipanc e a chi che à podù vardèr la competizion sul post o via streaming.

Mudà l’é stat ence l percors, a cauja de la tropa neif che amò l’era sui spic più auc, ma la Hero é ence garanzia de beleza e competitività, e donca l percors da 86 chilometres con 4.500 metres de dislivel (per chi che no à cernù l percors curt de 60 km, coret ence da la eles) no à volù esser più sorì che l solit. A venjer la competizion l’é stat tinultima Andreas Seewald che à coret l percors lonch te 4h26’57” e Katazina Sosna che à completà chel più curt te 3h50’45”.

Ma te la festa de la manifestazion gherdenera, gran contenteza à abù ence Fascia per i resultac de nonzech arjonc da si atlec. En particolèr l’é stat na proa da lauda chela de Manuel Verra e Gabriele Depaul, prumes atlec ladins al travert te la proa longia da 86 chilometres.

L’atlet del Fascia Bike Racing Team Manuel Verra l’é stat defat bon de serèr sù i 86 chilomtres de gara te 5h16’54”. N temp dassen bon che ge à fat vadagnèr l 57° assolut, 2° de categoria M1. Intervistà al travert, Verra se à lascià te pecia paroles, pienes de legreza e manconia: »Corer la Hero à la saor de la gara de cèsa, ence chest an portèda a compiment con n bon resultat, son dassen content. É pedalà te mia val, dedant a mia jent e mia familia, ence dessema a mia giava che per l prum an no l’é podù esser apede strèda a me veder passèr«.

Pech dò de el, ruà al travert te 5h22’14, l’atlet del Team SpaceBikes Gabriele Depaul che l se à logà coscita al 67° post assolut e 3° te la medema categoria. Conscidrà l livel de la proa, doi piazes emportantes per Fascia, amò più gustegoles se se peissa che i doi amisc se à logà ti prumes posć assoluc de la classifiches amatorièles, al 5° e 6° post, prezedan ence n bon numer de atlec profescionisć.

Etres trei i atlec che à coret coi colores fascegn. Guido Cuzzato à portà chi del Fascia Bike al 365° assolut, 33° categorìa M1 col temp de 7h26’57”. Nicolò Chenetti enveze, con la maieta del Pellegrin Cycling Team, l’à serà sù la proa te8h13’14” ruan 591° assolut, 55° categorìa M1. 

L terzo atlet, en gara coi colores del Fascia Bike l’era Valerio Bacchiocchi che l’à ampò cognù se retirèr n’outa ruà a Cianacei a cauja de problemes fisics padii fin da la pruma pedalèdes, ma jà l se à dit vertech a pontèr a la proscima Hero, a la proscima manifestazion da marevea.

Marevea donca, l’é semper marevea su la strèdes de la Bmw Hero. E festa, ence festa fascèna de gra a chi che, per na dì, vel proèr a esser eroes.

 (Daniele Verra)