La Usc di Ladins

Sön le ciamp da golf Tranrüs a Corvara vëgnel bele soghé dai prüms de jügn incá, cun n ciamp che se presënta te de bunes condiziuns ince por i ghesć da foradecá. En sabeda, ai 10 de messé, é i sogadus dl post gnüs metüs ala proa cun le pröm torné dla sajun, le »Haus Erica Golf Cup«, metü da jí dala familia Di Berardino da Calfosch.
Le bel tëmp ti á conzedü ai sogadus de golf da se gode les 9 büjes cun tröpa conzentraziun. Val' büja se presënta en chësc ann cun n valgönes dificoltés implü respet ai atri agn y ince i plü esperc á messü se studié fora avisa co messëi la tó. Por ci che reverda i resultac finai, él sté Christian Alton che á davagné la classifica “Lordo”. Chisc é i resultac por ci che reverda les atres categories tla classifica “Netto” - 1. categoria: 1. Nicoló Bagna - 20 punc, 2. Silvio Miribung - 17 punc, 3. Felix Schrott - 16 punc. 2. categoria: 1.Mattia Davare - 21 punc, 2. Michele Di Berardino - 19 punc, 3. Fausto Moscardo 18 punc. Tla categoria feminila á davagné Renate Pescosta cun 15 punc, secunda é rovada Amelia Furlanetto cun 15 punc y terza Jasmine Costamoling cun 12 punc.

Inurcaltan se arjigna i sogadus bele ca por la proscima desfida che sará en domënia ai 18 de messé cun le torné »Piz Boé Alpine Lounge Golf Cup by Movimënt«. Bele la sabeda pó i sogadus porvé fora le ciamp y spo da sëra é i partezipanc inviá ala cëna y presentaziun dl torné sön Piz Boé. La domënia metará man la competiziun sön 18 büjes dales 10:30.  (md)