La Usc di Ladins

A Maggiora, tla provinzia de Novara, él sté en sabeda ai 10 de messé la »Spartan Maggiora«, gara de »Spartan Race«, a chëra che ince l'atlet da La Ila Luca Pescollderungg á tut pert, davagnan la medaia d'arjënt. La »Spartan Race« é na gara a ostacui, daverta a düc chi che ó se mosoré cun ai instësc y afronté sü limic y sües tëmes, independentamënter dal livel de preparaziun. Porchël él por les gares de »Spartan Race« na classifica globala, che ti pormët dantadöt ai atlec plü alená da se bate cun aversars da döt le monn.

Medaia d'arjënt do da n ann de palsa
A gauja dl Covid n'él da n ann incá plü sté feter degönes gares de »Spartan Race«, porchël é chësta medaia por Luca ciamó plü na gran sodesfaziun. Da garejé n'ál porchël mai lascé, se conzentran indere sön d'atres competiziuns, en particolar le salté sö por munt. En sabeda á Luca tut pert ala »Spartan Maggiora«, desfiran la gara »Super«, na proa de dorada che se destënn sön 10 km olache al é almanco 25 ostacui da afronté. Chiló s'ál alzé fora y á concuisté la medaia d'arjënt. »Ti ultims agn é chësc sport dër chersciü y al é atlec tres plü prepará che tol pert ales gares. I sun dër contënt cun chësc secundo post, do da n ann che i ne fajô nia plü gares«, dij l'atlet da La Ila, che é rové al travert ma 13 secuc do Eugenio Bianchi, che á davagné l'or. Sëgn se arjigna Luca por les proscimes gares: en sabeda tolaral pert al »Dolomites Run«, gara da salté sö por munt che se desfira da Calfosch cina a Cianacëi y spo d'agost fajarál la »Spartan Race« a Morzine (Francia), olache al ê rové pröm dl 2019 y olache al porvará da defëne le titul.  (kp)