Tl monn dl golf ti vëgnel dit »Louisiana« ales gares a copies. Y propi na te' sort de competiziun é gnüda metüda da jí en sabeda ai 24 de messé sön le ciamp Tranrüs da Corvara. Le torné, che s'á desfiré sön 18 büjes, é gnü organisé dal Hotel Jägerhof adöm cun le Museum Sinsheim, la botëga Sport Pescosta y le grup de assiguraziuns Itas. Grana é stada la partezipaziun di sogadus dl post y da foradecá. Te na gara a copies vëgnel dagnora trat le pröm colp da tramidui i sogadus dla copia; al vëgn chirí fora la miú cogora y spo vëgnel soghé inant por deplü ores. Al é na forma de jüch che plej dër, che moscëda i mius sogadus cun i manco bugn y che porta pro a passé n bel de en compagnia. Le torné s'á stlüt jö cun na buna marëna y la premiaziun.
Pescollderungg y Camurri Piloni davagna »lordo« y »netto«
Cin' é les copies che s'á batü cina pro l'ultima büja. La copia che s'á alzé fora tla categoria »lordo« é chëra metüda adöm da Peter Pescollderung y Nicoló Camurri Piloni, cun 38 punc. Al secundo post, cun 35 punc, s'á plazé trëi copies: Elvis Pinter y Silvio Miribung, Doriano Francescangeli y Alberta Alghisi y i fredesc Nicoló y Pietro Bagna. Cun 34 punc s'á plazé al terzo post Christian Alton y Mattia Davare. Tla categoria »netto« él sté tres Pescollderung y Camurri Piloni che á davagné, baton Wilfried Moroder y Manuel Mair.
Inant jarára ai 7 y 8 d'agost cun n torné de benefiziënza che se deslariará fora nia ma sön le ciamp Tranrüs, mo ince ti pacs Movimënt, te bosch cuntra les cascades de Pisciadú y jö da pe dla Gran Risa. (Mattia Davare)
»Louisiana« sön le ciamp Tranrüs
En sabeda él gnü organisé sön le ciamp da golf da Corvara na gara a copies che s'á desfiré sön 18 büjes
Galaria retrac
View the embedded image gallery online at:
https://www.lausc.it/sport/16581-louisiana-soen-le-ciamp-tranrues#sigProIdf55af1453d
https://www.lausc.it/sport/16581-louisiana-soen-le-ciamp-tranrues#sigProIdf55af1453d