La Usc di Ladins

La terza edizion dl turnoi nterna­ziunel scumencerà n dumë­nia y n lunesc cun la cualificazions. Da dedò saràl bele l mumënt dl tabelon prinzipel, cun la partides fineles n juebia, vënderdi y sada. N vënderdi da sëira saràl la finela dl dopl, n sada danmesdì chëla dl singul.

Pra la cunferënza stampa à l presidënt dl Tennis Club Gherdëina, Ingo Mair, auzà ora danter l auter l'urganisazion ria cun la situazion cumplicheda che l ie al mumënt, ma che l ie unì laurà bën per garantì l miëur turnoi puscibl. Na gran deficultà àn nce abù cun la codles, che n à ala fin giapà, iust dan n valgun dis.
Per chël che reveda la puscibltà de jì a ti cialé ala partides, ne uniràl nia metù la tribunes, davia che l ie mé doi ciamps y chëi vën sambën tëuc ca per la partides. N puderà cialé pro da dedora dai ciamps, ora che per i ultimi doi dis, canche l unirà bonamënter metù ora stuei sun un di doi ciamps per ti cialé ala partides fineles.

Sibe l presidënt dl cumité de Südtirol dla FIT, Richard Weissensteiner, che l cunselier dl cumité naziunel dla FIT, Roland Sandrin, à auzà ora la tradizion dl tennis che Gherdëina se à urmei davanià, nce de gra y tres chisc turnoies nternaziunei, y che l ie bel che chësta tradizion vënie purteda inant tla miëura maniera.

L diretëur de turnoi, Wolfgang Wanker, à spiegà che »l ie passa 200 iscrizions. Tl tabelon prinzipel, da 32 jugadëures, iel ala fin: vint atlec che va ite diretamënter aldò de si posizion tla tlassifica mundiela, 4 atlec che giapa na »wild card« (na cherta, n nvit, a fé pea, che vën data ora danter FIT de Roma y cumité de urganisazion dl turnoi, ndr.) y ot atlec che vën dala cualificazions.«

L vizeambolt de Sëlva, Ivo Insam, à rengrazià l cumité de urganisazion a inuem dl'aministrazion de Chemun, juntan pro che "l se trata dl prim iede de chësc turnoi te Sëlva. Speron che l sibe l prim de na bela lingia."

Deplù, cun nce la paroles di trëi atlec de Gherdëina che fajerà pea – Patric Prinoth, Erwin Tröbinger y Gabriel Moroder –, tla edizion de duman vënderdi ai 22 de utober de La Usc di Ladins.

Bruno Maruca

Fotografia: dovia mpe: i doi jugadëures dl TC Gherdëina, Erwin Tröbinger y Patric Prinoth, che à giapà na "wild card" per l tabelon prinzipel. Dancà da man ciancia: Roland Sandrin (cunselier dla FIT), Richard Weissensteiner (presidënt dl cumité de Südtirol dla FIT), Wolfgang Wanker (diretëur de turnoi), Ingo Mair (presidënt dl cumité d’urganisazion dl turnoi y dl TC Gherdëina) y Ivo Insam (vizeambolt de Sëlva).