La Usc di Ladins

Ge jir do a na disciplina strenta, fata de alenamenc e de na alimentazion controlèda a na vida prezisa, zenza poder se conzeder per meisc na cena, na pizza, na bira o na beanda doucia o da gas, no l é sorì per nesciugn, ma amò de manco per n joen de 20 egn. 

Luca Daprai da Cianacei, student al ultim an del Liceo scientifich de Fascia, l à cernù de ge stèr do a regoles strentes con chela de »modelèr« sie corp per tor pèrt a la competizions de bodybuilding.

La costanza tel respet de la regoles porta sie ejic ence tel studie, e defat Luca Daprai l va n muie ben a scola, ma da pech per l joen da Cianacei l é ruà na gran sodesfazion ence tel setor agonistich. 

Tel fin de setemèna di 16 e 17 de otober defat Luca l é jit a Roma a tor pèrt al San Marino Pro. L era sia pruma competizion te la IFBB talièna (Federazion BodyBuilding) e chiò l se à jà vadagnà na medaa, ruan al terzo post te anter i ‘true beginners’ tel Classic Physique.  (Lucia Gross)