La Usc di Ladins

Rua endodanef na venta per l Fascia balon che de gra a na bona prestazion de squadra e al aiut di sostegnidores l é stat bon de venjer per 3 a 0 contra l Valsugana.

I prumes menuc de partida se jia soraldut tel mez del ciamp zenza ge dar cruzies a le defendure. Col jir di menuc rua le prume ocajion per i fascegn, con Deville che de ciaf l chiama al miracol l portier ghest e con Gabriele Riz che proa da fora de l’area ma amò na outa l portier ghest l para. Do taca a ofener ence i ghesć, che i ge dasc cruzies a la joena defendura fasciana, che ampò a valch vida la é bona de no ciapar l gol.

Te la seconda part de la endesfida Colusso e compagnes cer de segnar l gol del 1 a 0, ma do n cart d’ora dal scomenz del secondo temp i ghesć fala n gol sorì. Da chel moment i bec de mister Cigolla taca a majenar jech e al 17’ del secondo temp rua l prum gol con Gabriele Riz che da pec pasc da usc no l fala l »tap in«.

Seghita la endesfida e i ghesć i va inant per cerir l gol de la parità, ma te do i lascia i bujes e i joegn fascegn i é bogn de se n emprevaler, amò con Gabriele Riz che, ruà tedant al portier, l lo sauta e l met l balon junsom al sach.

Tel final rua l terzo gol con Patrizio Deville che met tel set na trata dai vint metres. Podessa ruar ence l quarto gol, dant con Petrone che tedant al portier l ge tira ados e do con Dennis Rasom che l se emponta e no l é bon de tirar te usc.

Na bela venta di fascegn de president Ghetta, che en domenia ai 7 i jirà a Albian a jiar da mese le trei domesdì contra l Porfido Albiano.

Resultac de la squadres mendres e classifica su La Usc de en vender ai 5 de november del 2021.

 (Pierpaolo Rasom)