La Usc di Ladins

Desche duta la setemènes sion a veder i resultac del setor mender di Falcons, che à vedù la formazions da l’U.13 en su, endèna che se speta neves sul campionat U.11 che cognessa scomenzèr prest.

Ence chesta setemèna i resultac no i é stac bogn, con trei desfates che é states aboncont segnèdes da n gran equilibrie. Desfates sul fil, i falchec amò stenta a fèr ponts, ma se vèrda inant con fiduzia.

Pontan via apontin dai più picoi, en sabeda ai 30 l’U.13 à vedù ruèr al Scola l Trent, formazion arcedèda anter l auter dal alenador fascian Giovanni Marchetti. L’endesfida é stata n muie scombatuda, con la squadra fascèna che à aboncont moscià amò n muie de defec de jech mencian tinultima la possibilità de venjer la partida. Do l 3 a 3 del prum temp e l 5 a 5 del secondo defat, l Trent l é stat bon de se portèr inant ti ultimes menuc de jech con l 6° e 7° gol.

Ajache l’U.15 à jià en mercol ai 3 de november canche siane en stampa, jon inant con l’U.17: endèna che la 13 jièa al Scola, la 17 scombatea col Trent al PalaGhiaccio. Ence chesta na partida dassen tirèda e che ampò l’à tinultima premià l Trent. Do n prum temp zenza goi l’é stat apontin i patrons de cèsa a troèr l dopie vantac tel secondo temp. L gol de Cristiano Weber à tegnù averta la partida e fat serèr l secondo temp sul 2 a 1. Tel terzo i ghesć à proà con duta la forzes, ma n nef gol trentin à serà l match sul 3 a 1.

La no ge é jita miec te la semper senestra trasferta de Aosta a l’U.19. Amò n’outa l é stat costion de pech, chel tant che à bastà per roinèr la festa di bec fascegn e fiamaces che tol pèrt al campionat dessema. Con i parzièi de 1 a 1 tel prum temp, gol de Nicolò Vicentini, de 2 a 1 tel secondo con gol de Igor Cassan e de 1 a 1 tel terzo con gol de Riccardo Gorgone, la partida é fenida 4 a 3 per i patrons de cèsa. Desfates sul fil, che per ades bruja, ma che pel mudèr co na picola ventèda. Se vèrda semper inant, con fiduzia.

 (Daniele Verra)