La Usc di Ladins

Te n slalom strënt y n slalom lerch se á mosoré en sabeda ai 9 de aurí i mius »Aliefs« y les mius »Alieves« dl Südtirol, dl Tirol y de Paiern tl »Dreiländerkampf«, competiziun che é rovada a süa 47ejima ediziun y che á iniann indô podü garaté, do che ara ê tomada fora por dui agn a gauja dla pandemia. Al pröm post s'á plazé le Südtirol, secundi é rová i atlec dl Paiern y terzi chi dl Tirol. Danter i 15 atlec y les 10 atletes dl Südtirol che á tut pert ala gara êl ince deplü ladins, en particolar dl Ski Team Alta Badia y dl SC Gherdëina. L'atlet badiot David Caslunger s'á plazé al 5. post te trames döes les gares, René Linder dl SC Gherdëina é rové 8. tl slalom strënt y 17 tl slalom lerch. I atri atlec di schi clubs ladins, Annika Rose Johannson, David Thaler, Alberto Davare y Mike Rifesser ne á nia porté a piz les döes proes tl slalom strënt. Tl slalom lerch é Mike rové 8., Alberto 22. y David 25. Dedô á i atlec y les atletes podü se devertí y se gode la bela manifestaziun sportiva y le »Tiroler Essen«, na buna cëna pro chëra che düc se á vistí le diendl o la braia de coran, stlujon jö sciöche al alda n'atra sajun sön i schi.  (kp)