La Usc di Ladins

Ai 11 e 12 de oril a Chiesa Valmalenco l é stat l ultim apuntament de la sajon per i atlec de la brea con i campionac taliegn assoluc e chiò l é ruà de bela sodesfazions per i snowboarder ladins.

L moenat Mirko Felicetti se à metù dintorn al col adertura doi medaes, chela de arjent tel slalom paralel e chela de bron tel slalom lèrch paralel. Ma la sodesfazions é ruèdes ence per Lucia Dalmasso, scrita ite al Ski Team Fascia, che se à vadagnà l secondo post tel slalom paralel e medema posizion ence per Georg Rabanser del ASV Snowboard Gherdena tel slalom lèrch. Complimenc a duc.

Per doer de cronaca dijon che l prum sciaier te duta doi la disciplines l é stat vent dai doi frèdes Coratti de la Finsca, Edwin e Jasmin, duc doi scric ite a le Fiamme Oro.  

L slalom lèrch paralel anter ic veit donca sul secondo sciaier Georg Rabanser che enceben che l aesse 49 egn l é amò n gran forma e sul terzo l moenat Mirko Felicetti che l é scrit ite al Circolo Canottieri Aniene ASD. Anter eles Jasmine l’à batù Elisa Caffont (Eserzit) e Elisa Fava (Freewhite Ski Team), Lucia Dalmasso é ruèda quarta.

Tel slalom paralel enveze sobito do Edwin Coratti l é ruà Mirko Felicetti, che l se à confermà sul podie do l suzes del an passà a Villnoess, e en terza posizion Maurizio Bormolini (Eserzit).

Anter eles tedò a Jasmin l é ruà Lucia Dalmasso e terza Sofia Valle (Polisportiva Alpe Cimbra).

 (MCI)