La Usc di Ladins

L é stat endò n moment positif per l Fascia Balon che, do aer perdù ai 18 de oril contra la Garibaldina per 1 a 0 per via de na prestazion no n muie positiva, i à vent sul ciamp de Cotura contra l Pinè per 2 a 1. 

Taca miec i joegn fascegn che ti prumes menuc i à jà na ocajion con Massimo Lorenz che l proa la trata da tanche fora l’area de rigor ma no l troa l speie del usc. 

I bec de mister Cigolla i jia ben, ma a passar en vantac l é i ghesć: do na trata de ciaf che vegn parada da Colusso, l balon ge fenesc ados al capitan Luca Trottner e dapò l rua tel usc fascian. Trottner e compagnes no se destramet e i proa a drezar la endesfida. Dant na gran azion de squadra fenesc co la trata da pec pasc de Samuele Ruggiero, che vegn deviada da n defensor en corner; su la trata dal cianton Ruggiero ge proa endò de ciaf, ma no l brinca l usc. 

Tel secondo temp jia miec i bec de president Ghetta e do trei menuc i é bogn de drezar la endesfida con Patrizio Deville, che do na trata da fora l ciapa l balon, l se outa e l segna l gol del 1 a 1. 

Passa autres 3 menuc e i fascegn passa en vantac amò con Deville, che l rua soul dedant al portier e l segna so diejem gol te la sajon do n bel assist de Michele Petrone.

De più su La Usc stampèda de vender ai 29 de oril.  (Pierpaolo Rasom)