La Usc di Ladins

Do dui agn de pandemia éra finalmënter indô jüda da organisé, la jöbia ai 19 de ma, la gara de conclujiun di cursc da nodé organisá dal grup sportif Badiasport. Do da feter 25 leziuns, che s'á desfiré fora por l'invern, ê i passa 60 mituns, mitans, jogn y jones, arjigná por tó pert ala competiziun. I plü asvelc é stá, tl grup di prinzipianc, che á nodé öna na vasca cun la brëia, Victoria Iconicoff (20,96 secunc) y Peter Granruaz (21,33 secunc). Tla categoria di maius, che á fat döes vasches tl stil lëde, á davagné Mara Sottara (23,66 secunc) y Philipp Adang (24,26 secunc). Tratan la premiaziun, a chëra che al á ince tut pert le vize ombolt y assessur al sport Christian Pedevilla, á le presidënt de Badiasport Daniele Irsara rengrazié i dui istruturs Luca y Verena. Stlüt jö é ince le curs da nodé por adulc, pro chël che al ê dui grups da 15 partezipanc. Badiasport tol l'ocajiun por rengrazié le comun de Badia y i sostegnidus dl'assoziaziun sportiva, che porta inant süa ativité dal 2007 incá. I cursc da nodé metará indô man de otober, do la palsa da d'isté.  (kp)