La Usc di Ladins

Ntëur trëimile atlec de livel nternaziunel y pasciunei dla roda à tëut su la ndesfideda de se museré sun i 86 o 60 km ntëur l Sela, per la 12ejima edizion dla BMW Hero Südtirol Dolomites. Chëst ann duta sot ala tematica dl respet ambientel "Hero to Zero".

La Hero ie nce na garejeda che fej pert dl "UCI Mountain Bike Marathon", ulache l fej pea atlec prufesciunisć. Pra i ëi dl'elite, che à garejà sun i 86 km, àl venciù l colombian Leonardo Paez. Chësta ie si setima vënta pra la Hero y cun n tëmp de 4:33:52 iel stat bon a tenì de zes si majer cuncurënt, Arias Cuervo Diego Alfonso, nce ël dla Colombia, che ie ruvà te travert do 4:36.20. Terzo ie l jëunn dl Südtirol, Gerhard Kerschbaumer, che do prima deficulteies ie stat bon de tré ite pusizion do pusizion, stlujan ju cun n tëmp de 4:41.20.

Sun i 60 km àl venciù Adelheid Morath di Paejes Tudësc cun n tëmp de 3:55.27 y si sëmi de vëncer n iede la Hero se à nsci realisà. Segonda ie ruveda la taliana Debora Piana cun 4:06.07 y terza Elena Gaddoni cun 4:06.41.

L ie nce stat atlec y pasciunei dla roda dla valedes ladines che à fat pea y se à tëut de bela sudesfazions.


Velch deplù iel da liejer tla proscima edizion de La Usc.


Sun la fotografies: la premiazion di ëi y dl'ëiles y vel' mumënt ntan la garejeda. (Fotografies de Freddy Planinschek)