La Usc di Ladins

Do la palsa da d’isté, mët sëgn indô man ince por les gran scuadres dla Val Badia i campionac amatoriai.

2a categoria
Do la esperiënza te pröma categoria, soga le ASC Mareo iniann tl campionat de secunda. La pröma partida é chësta domënia dales 15:30 sön le ciamp da "Ciamaor" a Al Plan, cuntra le ASV San Laurënz.

3a categoria
La scuadra dl US La Val mët man le campionat bele incö sabeda ai 3 de setëmber, olache al vëgn soghé dales 16:00 sön le ciamp da Prettau, cuntra la formaziun de ciasa.
La scuadra dl ACD Val Badia soga chësta domënia ai 4 de setëmber dales 15:30 sön le ciamp "Pradel" a San Martin de Tor, cuntra le ASV Uttenheim.

Rina tl campionat de palé a 5
Te chisc campionac mancel iniann la scuadra dla US Rina, che s’á te chësta sajun scrit ite al campionat de palé a 5. Piá ia ési bele al 1. de setëmber cuntra le ASV Aicha, olache ai á davagné de gran lungia por 5 a 0. La proscima partida é söl program ai 9 de setëmber dales 20:30, te ciasa cuntra le Bornech.  (pablo)