La Usc di Ladins

L é stat la V^ edizion del Trofeo Ladin Elite chela che se à serà su en vender ai 2 de setember al stadie Gian Mario Scola de Dèlba con la endesfida anter i patrons de cèsa del Fascia e l Cortina. Na bela partida, degna conclujion de n tornoi che à dat de gran emozions col retorn su la giacia do l istà e n spirit ladin semper vif te chesta ocajion nasciuda del 2018 e che à segnà la pre-season de la formazions ladines che se enjigna a tachèr l campionat de Alps Hockey League.

L tornoi era scomenzà ja al scomenz de aost con la partida del Olimpich ai 8 venta dal Cortina sul Gherdena per 5 a 3 e l era jit inant con l’endesfida de retorn al Pranives venta amò dai ampezegn 3 a 2 do la parità di tempes regolamentères. Ai 19 l era scomenzà l tornoi ence per i Falcons con na bona venta per 6 a 1 te cèsa contra l Gherdena, coi fascegn jic enveze a Selva ai 24 a perder 5 a 0. La ultimes doi endesfides les é states jièdes sessaben da Cortina e Fascia per completèr l tabelon, con la partida de Ampez ai 30 de aost e l at finèl al Scola ai 2 de setember fenii col medemo resultat de 2 a 1 per i Falcons.

»Sion contenc de la venta – à dit l arcedador di Falcons Marco Liberatore - ence se l é n tornoi da d’istà l livel l é aut perché l é Gherdena e Cortina, ma sion stac più forc nos, con sacrifizie mie jiadores à merità de venjer de nef chest tornoi«. 
Venjer l tornoi, se endrezèr per la neva sajon, ma ence seghitèr na tradizion e jièr l sport te na cornisc ladina. L event à ciapà ence chest an l patrozinie de l’Union Generèla di Ladins dla Dolomites.

De più su La Usc stampèda de vender ai 9 de setember.  (Daniele Verra)