La Usc di Ladins

A la fin i é stac de presciapech 80 i pascioné de doi rodes a motor che en domenia ai 6 de november i é rué te Fascia per tor pèrt a l’ultima garejèda de trial de chesta sajon. 

L endrez de una de la tapes del Trofeo Nord Est de trial é stat tout su oramai da 3 egn en ca la la sociazion »Rode a Motor« de Poza, con a cef Stefano Cincelli e che tol ite tel diretif l vizepresident Mirco Lorenz e dapò Alex Depaul, Nicola Detomas, Mauro Lorenz e Alessandro Cincelli.

L team à metù gran empegn per poder meter a jir chest apuntament, che domana temp e pazienza soraldut per ge stèr do ai tempes de la autorisazions provinzièles. Chest defat à fat ence entardivèr l’ultima tapa de chest Trofeo, che à metù sul calandèr te Fascia apontin l 6° apuntament, sburlà da otober a november. Do la autorisazions l é vegnù la pèrt del lurier concret per enjignèr duta la zones de gara: 5 é states enjignèdes sun Strada veia de Jumela, 2 su per Col da Ruf con ence 4 zones dedichèdes ai più picoi e apede ence la zona indoor te piaz de Bufaure, dedant a la stazion de la forenadoa. 

Dai più picoi spartii anter la categories Minitrial A e C, Minitrial Mono e Minitrial Entry, ai maores da la TR2 a la TR5 enscin ai Vintage.

Ai 67 partezipanc de la categories del Nord est se à jontà ite a Poza ence na chindejina de concorenc tel campionat talian de moto d’epoca, che, ne à dit l president Stefano Cincelli, i ge à domanà a la sociazion fascèna de poder recuperèr na garejèda che era sutèda per poder fenir l campionat. Ic à garejà sui medemi percorsc di più picoi del Minitrial, ajache chesta sort de moto à n peis maor e ence chi che tol pèrt en generèl i é mingol più inant con l’età. 

De più su La Usc stampèda de vender ai 18 de november.  (Lucia Gross)