La Usc di Ladins

En domenia ai 13 de november aló da la senta del CONI de Trent l é stat premià i atlec che se à desmostrà i miores te la 12 categories pervedudes dal regolament del Zircuit Trentin Mountain Bike e i é stac decreté ofizialmenter venjidores assoluc del Tour 2022 l fascian Gabriele Depaul del Team Todesco e Lorena Zocca de la SC Barbieri.

L zircuit Trentin l bina ensema la garejèdes più emportantes de la provinzia, con n program che va inant per dut l istà e che chest an l à tout ite la 100km dei Forti, la Dolomitica Brenta Bike, la Monte Baldo Bike, la Valsugana Wild Ride (che sarà ence senta di Campionac Taliegn Marathon 2023), la Mythos Primiero Dolomiti e la ValdiNon Bike. L event, che fèsc pèrt di Gregn Evenc de Trentin Marketing, l bina ite da semper gregn numeres de pascioné che vegn da duta la Tèlia per corer sun nesc troes da mont, e l é semper ence vèlch atlet fascian. Anter chisc Gabriele Depaul che, descheche aon antizipà, chest an l à vadagnà n travert de gran onor venjan l zircuit no demò te sia categoria M1, ma adertura a livel assolut! Per chest ge aon domanà fora vèlch de chesta beliscima sajon.

Podede lejer l'intervista su La Usc stampèda de vender ai 18 de november.  (Daniele Verra)