La Usc di Ladins

Les era 7 la partides en program per l fin de setemèna passà de Alps Hockey League, ma tinultima se n à jià 6. Sutèda defat la soula gara en program en domenia ai 27, chela anter Vipiteno e Gherdena che aessa cognù vegnir jièda fora la Weihenstephan Arena e che é stata sburlèda a cauja de problemes de giacia che per na costion de temperatures falèdes la podea esser pericolousa e no aldò per na partida profescionistica. Do n prum renvie de 30 menuc per proèr a miorèr la situazion tras la rolba, i doi arbitres Bulovec e Rezek i dezidù de sburlèr l enconter per stravardèr la sanità di jiadores.
Duta l’autra partides é states jièdes en sabeda ai 26: na endesfida anter la pruma e l’ultima de categoria, Jesenice vs Linz; una sul cef de la classifica anter Zell Am See e Cortina; l’autra ladina, l Fascia, empegnà contra l Kitzbühel, e amò l derby sudtiroler anter Unterland e Meran, l’endesfida duta austriaca anter Lustenau e Salzburg e la partida anter Renon e Bregenzerwald.


Dant de veder en curt coche l é jit la endesfides de la doi ladines empegnèdes, volon dèr ence na veièda a la classifica a la fin del meis de november, recordan che endèna che nosc sfoi jia en stampa se à jià vèlch auter match. La pruma de la categoria é per endèna l Jesenice con 45 ponts. Al secondo post l é la pruma talièna, l Unterland con 40 ponts; al terzo l Salzburg, semper con 40 e al quarto la pruma ladina, l Cortina con 39 ponts. Quinto l Zell Am See con 35 tel ultim post bon per l master round che se jiarà a la fin de la regular season e dapò l Renon a 32. Vegn do l Kitzbühel con 29 ponts e l Gherdena con 28; Vipiteno con 25, Meran con 23, Lustenau con 22, Bregenzerwald con 19 e Klagenfurt con 16. Medemi ponts che à l Fascia, catordejeisem al penultim post, dant del Linz con 15 ponts. Sessaben che chesta l é na classifica parzièla de la regular season e che, descheche l é jà sozedù l an passà, nesciuna squadra é fora dai jeghes per i playoff de gra a la formula n muie averta e competitiva de la AHL. Ma fosc na pruma indicazion de la forzes en jech se pel scomenzèr a la lejer, do più che doi meisc de jech. E, se se vel aer n focus su la trei ladines, al moment chesta letura disc che la trei forzes les é sparpagnèdes: l Cortina dassen competitif, l Gherdena tel zenter de la classifica che l cogn capir se se rampeèr en aut o sluzièr en do, l Fascia che cogn seguramenter proèr a se meter te gofa vèlch pont de più per se trèr su dal fon de la classifica.

De più su La Usc stampèda de vender ai 2 de dezember.  (Daniele Verra)