La Usc di Ladins

La radunanza del Ski Team Fascia, la storica sociazion sportiva de val chiamèda ite en mercol ai 23 de november, la era straordenèra ajache l Consei à volù che sia i sozi a dezider se seghitèr a se meter a la leta per l endrez de competizions internazionèles e tor pèrt al nef Comitat gregn evenc de Fascia che é do a nascer su spenta de l’APT de val. Per la Copa Europa de chest an aon jà cognù dèr la desponibilità, no se podea spetèr – à dit l president Ivo Bernard – ma per l davegnir cognon dezider.

L nef Comitat che nasc sot l ciapel de l’APT – à deschiarì l president Fausto Lorenz e l diretor Paolo Grigolli – l à l zil de sostegnir la sociazions che endreza chisc gregn evenc, tant dal pont de veduda aministratif e burocratich che da chel de la responsabilità. 

L é stat defat apontin la gran competizions internazionèles, massa empegnatives per vegnir gestides diretamenter da n grop de volontadives, che à metù en dificoltà economica ti ultimes egn l Ski Team Fascia. La dezijion de tor pèrt al nef Comitat, e ence l picol mudament al art. 2 del Statut per meter neigher su bianch che l endrez di evenc l é anter i fins de la sociazion, é stac aproé te n senteamen. Maora l é stat la discuscion te la radunanza sul problem de la ‘mission’ sozièla del Ski Team. Defat l cost metù fora per la neva sajon da d’invern per tor ite e arcedèr sui schi i bec l é cresciù debel, e chest à soscedà dubies e ence vèlch critica e permèl.
L president Bernard l à dit che l ge domanarà ai Comuns n sostegn dedicà per i più picoi, per no cogner pesèr massa su la families e l se à resservà de i arbassèr se demò che la va.

De più su La Usc stampède da vender ai 2 de dezember.


 (Lucia Gross)