Copa dl Mond: Gisin stabil - Kilde vënc

Data

15 de dezember 2018

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Danora la ntraunida che fej unì secundera la pert dl sport: l svizer Marc Gisin ncrëuja i schi puech dan La Gobes de Camel, toma y vën petà plu lonc dal saut demez, ju sun ch’i coi, batan l uf y l spinel dantaldut, y unian da nescia. N gran spavënt per duc canc. Riesc ie pià su l joler, y do n struf àn per fertuna pudù l mené demez te spedel, ntan che Gisin se n savova inò. Da coche n à audì ntëur la doi domesdì fova la situazion de Marc Gisin stabiles, nce sce n ne pudova mo nia dì na segura.
Nce dal pert dla USC y di letëures l’aodanza de dut l bon y che l posse varì tosc.

Do 30 menuc de nteruzion piova pona ju Aksel Lund Svindal che ova venciù inier (vënderdi) l Super G. Ma nce per ël nia da n fé, massa bon ie stat Aleksandar Aamodt Kilde, cun ntëmp de 1.56.13. Svindal ruva setimo, do Travis Ganong.
Bele lassù fova Kilde de truep danora, y do y do ne àl falà nia, no sun la Gobes de Camel, no sun ch’la doi raides sciorfes dan i prei de Ciaslat, no a jì ite tla pert de Ciaslat. Ala fin n vantaje de marueia, de bën 86 centejims dan l austriach Max Franz +86 y l svizer Beat Feuz cun +92, iusta mo dan l american Bryce Bennett +98, che à manacià la sensazion de ruvé sun l podest, ruvan mo dan Steven Nyman che fova danora un di favoric sucrëc.

Sciacà ti àla ai azzurri, almanco ai doi südtiroleri Paris y Innerhofer, plazamënt 17 y 18. Do la rata mo bon ie l jëunn talian Emanuele Buzzi 15ejim.

Werner Heel ie ruvà 30ejim ma l resta l sëul dla Naziunela Taliana che à venciù n Super G sun la Saslonch. N sada iel stat n iubileum per Heel: l ie pià via per la 200ejima garejeda de Copa dl Mond. Cungratulazions!

N generel iel da dì che l purtoi fova de marueia, l percurs de marueia tl mescedoz debota-tecnich, l tëmp à judà pea: nsciuma - lecurdan for la desgrazia de Gisin - chëles dl 2018 ie doi dla garejedes plu beles dla storia de Copa dl Mond te Gherdëina. Cumplimënc ai urganisadëures y ulenteres. Y sambën nce a San Piere per l bel tëmp, y de gra a Chël Bel Die per la cuntreda de marueia che fajova da paladina per i chedri che ie unii mandei ora te mez l mond tres televijion.

Se ncunferton sun la garejedes dl’ëiles n merdi y n mierculdi!

Sun la foto: Aleksandar Aamodt Kilde vënc la Libra sun la Saslonch. 

David Lardschneider


La tlassifica

1. Aleksander Aamodt Kilde 01:56,13

2. Max Franz +00,86

3. Beat Feuz +00,92

4. Bryce Bennett +00,98

5. Steven Nyman +01,01

6. Travis Ganong +01,05

7. Aksel Lund Svindal +01,08

8. Mauro Caviezel +01,12

9. Adrien Théaux +01,17

10. Hannes Reichelt +01,31

10. Benjamin Thomsen +01,31

12. Josef Ferstl +01,33

13. Johan Clarey +01,34

14. Niels Hintermann +01,37

15. Emanuele Buzzi +01,55

16. Adrian Smiseth Sejersted +01,62

17. Dominik Paris +01,72

18. Christof Innerhofer +01,75

19. Andreas Sander +01,77

20. Manuel Schmid +01,91

21. Dominik Schwaiger +01,98

22. Patrick Küng +02,12

22. Mattia Casse +02,12

22. Vincent Kriechmayr +02,12

25. Martin Cater +02,14

26. Kjetil Jansrud +02,28

27. Thomas Biesemeyer +02,29

28. Wiley Maple +02,30

29. Nicolas Raffort +02,31

30. Werner Heel +02,35

 

 



Galaria retrac