Resultac di atlec de Gherdëina ntan chësc ultim fin dl’ena

Data

14 de jené 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Schi Alpin
Tl slalom de Copa dl Mond a Adelboden ie l jëunn Alex Vinatzer n dumënia ai 13 de jené ruvà 20ejim. Do che l ie tla ultima garejedes, nce do de bon resultac de manche, for inò tumà ora, iel chëst iede stat bon de stlù ju tramedoi manches. Per l jëunn de Sëlva iel l segondo miëur plazamënt te Copa dl Mond y per ël se tràtela nce permò de mparé a cunëscer i purtoies de Copa dl Mond sun chëi che l garejea per l prim iede.

N sada y dumënia ai 12 y 13 de jené à l Schi Club Gherdëina metù a jì doi garejedes de slalom lerch FIS per aspiranc y juniores sun Piz Sela. Sambën à truepa atletes y truep atlec dl SC Gherdëina fat pea, ma l n ie nce unit na bela cumpëida da oradecà a fé pea. I atlec de Gherdëina se à batù scialdi bën, cun Teresa Runggaldier, Aaron Senoner y Filippo Collini che ie ruvei sun l podest. Danter la primes diesc se à mo tlassificà Sofia Kerschbaumer (4.), Nicole Nogler Kostner (5.), Jamie-Lee Pellizzari (6. y 9.) y pra i mutons Aaron Senoner (9.). Venciù l slalom lerch de n dumënia à danter l auter la atleta dla Val Badia Emmi Frenademez. Duminà à i atlec y la atletes di USA.

Cumbinazion nordica
Tla Val de Flëm iel ntan l fin dl’ena dai 11 ai 13 de jené unì garejà te trëi garejedes de Copa dl Mond.

Samuel Costa ie tla doi garejedes Gundersen dal gran saut cun 10 km de pudejé ruvà tramedoi iedesc 21ejim, fajan nce i miëur sauc di atlec dla scuadra taliana. Deberieda cun Alessandro Pittin à Samuel stlut ju la Team Sprint al boniscimo 4. post. Per Samuel, che ie stat ora duta la sajon passeda do plu uperazions, ie chisc de biei resultac costanc, che dà crëta per l daunì.
I autri cumbinatisć de Gherdëina che à garejà tla Val de Flëm fova Aaron Kostner cun n 35ejim y n 36ejim post y Manuel Maierhofer cun n 42ejim y n 44ejim post.
Lukas Runggaldier ne se à tl “provisorial round“ nia cualificà per la garejeda ufiziela y tla Team Sprint iel ruvà 15ejim deberieda cun Aaron Kostner.
Inant jiràla per ëi ai 18 de jené a Cheaux Neuve tla Franzia.
Tl Alpencup a Schonach pudons auzé ora l beliscimo resultat de Daniela Dejori, che, davanian doi plazamënc tla garejeda de pudejé, ie ruveda terza (Velch deplù da liejer tla proscima Usc)

Foto: Samuel Costa.


Saut
L’ëiles dl saut cun i schi ie al mumënt tl Iapan. Chësc fin dl’ena garejòveles a Sapporo y tlo à Elena Runggaldier fat doi scialdi de bona garejedes arjunjan n 12ejim plazamënt y l di do se miuran mo n iede ruvan al 9. post.
Per la jëuna Lara Malsiner iel sautà ora te chësta garejedes n 29ejim y n 21ejim plazamënt.
La garejedes de Copa dl Mond jirà inant per ëiles ai 18 de jené for tl Iapan y plu avisa a Zao.
Nce i ëi dl saut cun i schi se à fermà tla Val de Flëm y sun l saut a Pardac ie Alex Insam passà la cualificazions al 35ejim post. Tla doi garejedes de Copa dl Mond se àl tlassificà n iede 41ejim y l di do 47ejim se ferman al prim saut.

Foto: Elena Runggaldier


Slopestyle
Silvia Bertagna ie n sada ai 12 de jené a Font Romeu tla Franzia, cun na boniscima segonda manche, stata bona de se tré inant nchin al 8. plazamënt te chësta cumpetizion de Copa dl Mond de slopestyle.
Inant jiràla per ëila ai 19 de jené a Laax y pona ala fin dl mëns n cësa sun Mont de Sëuc.


Snowboard
Daniele Bagozza à arjont n 15ejim plazamënt tl’ultima garejeda de slalom paralel de Copa dl Mond a Bad Gastein.
N sada ai 19 de jené jiràla inant per ël cun n slalom lerch paralel a Rogla tla Slovenia.


Biathlon
Irene Lardschneider ruva sesta tla sprint dl IBU Cup de n dumënia ai 13 de jené tla Polonia, ne falan degun colp a stlupeté. L ie chësc si prim plazamënt tla primes diesc te chësta sajon.
Per ëila jirà la garejedes inant ai 17 de jené a Arber ti Paejes Tudësch.
A Oberhof ie Alexia Runggaldier ruveda 79ejima tla sprint, falan doi colps a stlupeté y cun la stafeta taliana àla arjont l 15ejim plazamënt.
La garejedes de Copa dl Mond de biathlon jirà inant ai 16 de jené a Ruhpolding.

Articul de Ulrike Maierhofer