Atletes e atlec mondièi su La VolatA

Data

16 de jené 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Sul bel portoi de Sèn Pelegrin se à binà chisc dis la nazionèla talièna de eles e n muie de autra atletes che en jebia e en vender tolarà pèrt a la libera de Copa Europa.


L Pas de Sèn Pelegrin te chisc dis l’é teater maraveous de competizions internazionèles. Enscin ai 18 de jené su “La VolatA”, un di portoes più erc del raion, se arcedea e dapò garejarà atletes e atlec da duta Europa. Dò i dis resservé a la proes cronometrèds, en jebia ai 17 e en vender ai 18 de jené inant mesdì sarà defat la doi proes ofizièles de libera de Copa Europa de eles.

La manifestazion é dedichèda a la memoria de Alberto Vendruscolo e l’à jà chiamà sacotenc pascioné de schi entornvìa chest bel portoi, olache da dis i operatores de la sozietà, dessema ai volontères, é dò a lurèr per enjignèr dut al miec e arsegurèr che dut sie a post e segur.

La miores atletes d’Europa se darà batalia sun chest portoi che, con si 2.300 metres per 630 de deslivel e na pendenza del 50%, se met dant desche n ciamp ezelent per la disciplines asveltes per i atlec mondièi del maor livel.

No per nia chest l’é ence un di lesc cernui per se enjignèr ai maores apuntaments de la sajon agonistica de schi, no demò da da la nazionèla talièna, ma ence de etres Stac desche Franzia, Svezia, Finlandia, Slovenia, Slovachia e Germania.

Omologà Fis e Fisi per garejèdes internazionèles e nazionèles, chest portoi te pech temp sarà teater - ensema con l Ski Stadium de Aloch per la disciplines tecniches - de n auter gran apuntament internazionèl: i Campionac Mondièi junior de schi alpin 2019, con i miores atlec del schi mondièl anter i 16 e i 20 che ruarà chiò de firé da zirca 50 nazions per se jièr fora i titoi te 33 garejèdes.

 (lg)