Miëur tëmp per Alex Vinatzer - Festa te Sëlva inier juebia

Data

22 de fauré 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L ne n’ie - almanco mo - nia stat l miëur tëmp de duta la garejeda, pra i Campiunac dl Mond. Ma pra l slalom che à stlut ju i Campiunac dl Mond a Are tla Svezia ie l jëunn de Sëlva stat bon de fé l miëur tëmp de manche

Schi Alpin - Pra la ultima garejeda di Mundiei, l slalom, ie l jëunn de Sëlva ruvà 19ejim. Tla prima manche se òvel falà cun l material y ne ova nia dat chël che l fossa bon de dé. Tla segonda manche, pona: miëur tëmp de duc, fajan n saut dal plazamënt 28 inant de ades diesc posizions. Vinatzer à mustrà de avëi dut per tenì pea cun i miëures dl mond.

Cossa che l ova perauter bele desmustrà a puntin tla garejeda a scuadres pra i Campiunac dl Mond, ulache l ie stat bon de ruvé sun l podest, deberieda cun Lara Della Mea, Irene Curtoni y Simon Maurberger. Resserves fova Marta Bassino y Riccardo Tonetti.

Inier juebia ai 21 de fauré da sëira à l Chemun de Sëlva nvià a na bela festa sun Plaza Nives te Sëlva. Per ti fé unëur a Alex y si cumpanies.

Inant vàla cun i Campiunac dl Mond Juniores che ie te chisc dis te Fascia. Vinatzer toca pra i favoric.

Bravo Alex, son duc cuntënc per y cun té, son duc stolc de té: inant nscila, restan cun i piesc vie per fonz, ma savan de ti putenzialità!

Ah, mo zeche: te ies nce stat scialdi bon pra la ntervistes fates te plu rujenedes, bon y dalaibon. Cumplimënc!

Sun la foto: Alex Vinatzer ie inier unì festejà te Sëlva. L jëunn de Gherdëina ie un di favoric pra i Campiunac dl Mond Juniores che ie te chisc dis te Fascia.

David Lardschneider