Caterina Ganz convochèda te la Copa del Mond

Data

14 de merz 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Per la ultima gares a Falun e Quebec l’é ence la ampezana Anna Comarella.

I é set i convoché de la FISI per la ultima garejèdes de Copa del Mond de paslonch che sarà chest fin de setemèna a Falun te la Svezia. L diretor tecnich Marco Selle à chiamà Francesco De Fabiani, Federico Pellegrino, Stefan Zelger, Giandomenico Salvadori, Lucia Scardoni, Greta Laurent e Elisa Brocard. En sabeda ai 16 de mèrz l’é en program na sprint a tecnica ledia e en domenia ai 17 na proa de 10 chilometres de eles e na 15 chilometres de ic semper a tecnica ledia.  

La setemèna che vegn se serarà sù la sajon con l minitour de Quebec tel Canada. En vender ai 22 de mèrz con na sprint a tecnica ledia, en sabeda ai 23 con na 10 chilometres de eles e na 15 chilometres de ic a tecnica classica e en domenia ai 24 con na proa a inseguiment a tecnica ledia. E chiò l’é stat scrit ite Francesco De Fabiani, Federico Pellegrino, Maicol Rastelli, Giandomenico Salvadori, Lucia Scardoni, Greta Laurent, Anna Comarella, Elisa Brocard e Caterina Ganz.

La atleta da Moena à declarà chisc dis passé de aer vivù na sajon emportanta per sia crescimonia, tant te la robes positives che te cheles negatives. “No pete demez nia de mia sajon – à dit Caterina – nince i resultac negatives desche chi de Seefeld, che podarà esser de utol per l davegnir. Me endespiasc de no aer fat n bel resultat a Holmenkollen ma ciape de bon chel che é fat fin canche son cradada jabas, ere dò che fajee na bona gara e aee sensazion miore respet a Seefeld. Ma no me lasce jir percheche voi serar sù al miec chesta sajon che la é dò che la me ensegna n mulge.”

A Caterina e a Anna ge dijon “te la gramoles del louf”.  (mci)