Gran legreza sun Rodela col Ski Team

Data

13 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
La sozietà à serà sù la sajon con la garejèdes di gropes agonistics te na bela dì de soreie.


En domenia ai 7 de oril a despet de la previjions che manacèa catif temp, l bel grop de sozi, familiares, amisc e simpatisanc del Ski Team Fascia che se à binà sun Rodela per l’ultim apuntament agonistich de chest invern, i à podù se goder dassen na bela giornèda de soreie.

L’apuntament, na setemèna dò chel dedicà ai bec del cors lonch, l’era chest’outa con i scric ite ai gropes agonistics. 140 sozi se à scrit ite, vèlch un no à podù tor pèrt ajache l’era amò vèlch autra garejèda, ampò no l’é mencià la competizion, dai più picoi ai più gregn. 

Da segnalèr ence chest an la bela proa de Marino Deluca, clas 1934, che a la bela età de 85 egn l’à corì l percors tel temp de 1.22.79. De bie batimans ence per Ettore Costazza, père de Chiara, clas 1942, che l’à stat demò 1.00.14, passan via ence desvalives schiadores più joegn, e per l grop “Vintage”, che tolea ite i alenadores del Ski Team, che per l’ocajion i à endò tirà cà mondures e schi di egn ’70 o ’80. No l’é mencià i simpatisanc, che i é rué sun Rodela per compagnèr i più picoi e i à volù ge dèr l bon ejempie sportif.

Dò la garejèda l’é stat n bel moment de festa, con la premiazion mingol anticipèda per tema de la  neif. L president Leonardo Bernard ge à dit n gran detelpai a duc chi che à tout pèrt, ai alenadores e ai atlec che se à dat jù con empegn e gaissa per duta la sajon, ai sponsor e a duc chi che deida e ge stèsc apede al Ski Team Fascia. La festa de premiazion é stata viventèda ence da la prejenza de n sozio de ecezion: l curat de Cianacei e Dèlba don Mario Bravin.  (lg)