L Fascia arjonc la finèla de Copa Provinzia

Data

18 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Gran resultat per l Fascia balon! La squadra de mister Chelodi no mola nience la ciacia al prum post tel campionat

L’é stat na setemèna de gran sodesfazion per i colores ladins del Fascia Balon che, en jebia ai 11 de oril, aldò de na partida dassen rica de emozions, l’à vent la semifinèla de Copa Provinzia, se vadagnan l dirit de jièr la finèla ai 15 de mé contra l Predaia, tel stadie Briamasco de Trent.

Dò aer perdù per doi a un te la partida de jita sul ciamp de Mori, al Fascia no ge restèa auter che venjer sul ciamp amich de Vich, che per l’ocajion se à regolà da festa con n grum de jent, soraldut joegn de la squadra mendres, rué a sostegnir i joegn de mister Chelodi e che, se cogn dir, i é stac dalbon l dodejeisem om te ciamp.

A desferenza de la pruma partida, olache l Fascia aea padì al scomenz mingol de agitazion ciapan sobito i 2 goi, enstouta i ladins i é jic te ciamp zenza tema de nia e con la soula idea de dèr dal prum menut de jech la direzion a la endesfida e coscì l’é stat. Defati, dò cinch menuc Gabriele Riz à portà l Fascia en vantac, trajan te usc na bala che rodolèa zenza patron dedant l portier ghest.

A cauja del gol de cef de Amal, la fin del prum temp à vedù la doi squadres jir a beiver l té en parità.

Enceben l resultat de 1 a 1, la soramessa sul pian del jech del Fascia sui ghesć la era stata neta e la fajea ben sperèr per i secondi 45 menuc, che i é ponté via con Deluca e compagnes amò più zaches e semper en atach. Al chindejeisem l moment dezisif: Gabriele Riz e Matteo Lorenz proa a ruèr ti seidesc metres ma l defensor aversarie bloca l balon co la man. L diretor de jech no bazila e l conzet la trata dai 11 metres che Sebastiano Rasom, zenza cutia, no l fala. 2 a 1 e resultat de la partida de jita valivà. Coscì al triple scìgol l resultat de 2 a 1 portèa la endesfida a la trates dai unesc metres co la tenjion a mile, te ciamp e su la tribunes.

A ge dèr la venta al Fascia, se tolan la reventa per n fal sul prum gol, ge à pissà Colusso, co na gran parèda su la quinta trata di ghesć, dajan l via a na gran festa anter jiadores e sostegnidores. Per l Fascia sarà la quinta finèla de Copa, cater de Pruma e una de Seconda Categorìa. De cheles jièdes enscin ades, i fascegn à portà a cèsa trei ventes e una desfata.

Lejé la cronaca completa su la Usc nr 16 stampèda ai 19 de oril

 (Cristoforo Debertol)