Fascia à sie Campion Provinzièl!

Data

24 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En lunesc ai 22 de oril l’é stat la Ala-Ronchi UpHill. Gregn resultac per i bikers fascegn, con Depaul al secondo post assolut e Verra che se à tirà ite la maia del Trentin.
L’é stat n lunesc de Pèsca da se tegnir strent ti recorc chel di bikers fascegn che à tout pèrt a la Ala-Ronchi UpHill, garejèda stel cronoscalata ruèda chest an a sia 7^ edizion. L percors lonch 12 chilometres con n dislivel positif de 550 metres pervedea apontin, pean via da Ala, de arjonjer l travert de Ronchi tel temp, sessaben, più bas che l’era meso.

Chiò i atlec de Fascia se à portà a cèsa de gregn resultac: Gabriele Depaul l’é stat bon con na prestazion de aut livel de portèr sia maia del Team Spacebikes adertura te la seconda piaza assoluta, ruan al travert demò 11 seconc più tèrt che Kevin Fantinato e dedant a Andrea Zamboni. Depaul à portà coscita sia roda ence al prum post de la categorìa M1.

Gran legreza ence per Manuel Verra, 12° te la classifica assoluta con l temp de 37’3”, l’atlet del Fascia Bike Racing Team l’é stat bon de se vadagnèr la seconda piaza de categorìa M1, prum anter i atlec tesseré te na sozietà trentina; chest maraveous resultat ge à consentì coscita de se trèr ite a la fin la maia de Campion Provinzièl del Trentin.

N bel resultat che darà amò gaissa per la proscima garejèdes, la sajon é giusta scomenzèda.  (Daniele Verra)