Palé: leghermes y ligrëzes

Data

24 de auril 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ince tl fin dl’edema de Pasca é les scuadres dla Val Badia stades impegnades tles partides de campionat. Le bilanz: döes devëntes, n pér y na pordüda.
La Val - Vandoies: 4 - 1
Metun man cun les bunes noeles: tl campionat de 2a categoria ti á la scuadra da La Val dé na rosedada pesocia al Vandoies, batü por 4 a 1. Al ê zacó na partida danter i ultims, deache intrames les scuadres é tla pert bassa dla classifica. Tla partida sogada söl ciamp ladin, án atira albü n mëteman movimenté, cun La Val che sëgna bele al 1^ menüt cun Campei y le Vandoies che avaliëia al 5^. Campei ê indere en gran forma chësc de, y sëgna ciamó dui iadi denanche jí tla palsa. Stefan Sottara stlüj le sach al 49^ cun le cuarto gol ladin. Trëi punc miritá.

Mareo - San Laurënz: 2 - 3
Cin’ goi él ince garaté tla partida söl ciamp da Al Plan danter Mareo y San Laurënz, olache i ladins é indere restá zënza punc, cun le resultat final de 2 a 3 por i pustri. I maroi é por dui iadi jüs sot de n gol, mo é stada buna da avalié, impröma cun Robert Mutschlechner y spo cun Pius Ploner. I pustri sëgna indere le terzo gol, che ai mantëgn sciöche vantaje cina al sciüre final.

Steinhaus - Val Badia: 0 - 0
Degünes rëis indere por la scuadra dla Val Badia, che resta al ultim post dla classifica. Sön le ciamp da Steinhaus él ma garaté n punt su cun degügn goi. Anunzié pón indere che i aversars á falé jö n önescmetri al 7^ menüt.

Dietenheim - Rina: 3 - 2
Tl campionat de terza categoria él le Dietenheim che tëgn sö l’avanzada dl Rina, che gnô da trëi devëntes indôlater. I pustri vá bele en vantaje al 1^ menüt, denanche al sozedes le patatrac al 20ejim. Impröma él David Huber che porta süa scuadra indô sön le resultat de parité, mo baldi i sozedel al Rina ince n autogol, che porta indô i pustri cun le nes danfora. Indô él David Huber che descëda les speranzes, canche al sëgna n önescmetri al 58^. I pustri ne la dá indere nia sö y vá a rëi por le terzo iade al 73^, meton a saul i trëi punc.

 (Pablo)