Ötzi Alpin Marathon, n triathlon superlatif

Data

09 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Ai 27 de oril l’é stat la Ötzi Alpin Marathon, garejèda a trei sezions che à vedù ence partezipazion fascèna. Bogn resultac per Mauro Rasom e Manuel Verra
Pontèr via da Naturno a 550 metres dal livel del mèr, olache i pré i é jà verc e en fior, envers l giacé de la Val Senales a quota 3200 metres, chest l’é a la bona l percors che caraterisea l maraveous triathlon che à inom Ötzi Alpin Marathon. Zirca 150 i atlec che à tout pèrt individualmenter a la garejèda di 27 de oril, con apede na cincantina de team formé da 3 persones l’un per la proa a stafeta. I 42,2 chilometres, con dislivel positif de 3266 metres, i jìa apontin traversé metan ensema, una dò l’autra, trei desvalives spezialità: roda da mont, corsa e pouses. Chest podea esser fat tant da un soul atlet che da na squadra che aessa fat partezipèr un atlet per vigni proa.

A se dèr jù tel busanin no l’é mencià i atlec fascegn. Mauro Rasom se à scrit ite a la garejèda tel team 3 Musketiere dessema a Simon Morandell e Martin Markt. Con l temp de 53 menuc, l fascian à fat segnèr l 9° temp te la sezion de la corsa; sie team à tinultima serà sù al 6° post anter i team mascolins col temp total de 3 ores e 31 menuc. Te la medema categorìa, al penultim post te la 37^ piaza assoluta se à logà l team di Bogn da Nia componù da Andrea Casari, Efrem Delugan e Valerio Lorenz, con l temp de 5 ores e 18 menuc. L soul atlet fascian a ge fèr front individualmentèr a duta la trei proes l’é stat enveze Manuel Verra del Fassa Bike: dò aer serà sù la pruma doi proes al quarto post, l biker fascian à padì na crisa te la sezion con la pouses che l lo à petà de retorn al 18° post finèl con l temp de 4 ores e 8 menuc.

Articol entriech su la Usc nr 18 stampèda ai 10 de mé  (Daniele Verra)