L Fascia en Pruma Categoria!

Data

19 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Con la venta contra l Predaia i ladins se à merità la promozion. N bel suzess per duta la squadra del president Walter Ghetta

Con doi partides dantfora su la fin del campionat, l Fascia l’à arjont l zil de la promozion te la Pruma Categoria.

De gra a la venta per doi a un sul senester ciamp de Taio, contra l Predaia, i ladins à lascià vindò de 15 ponc la doi terzes en classifica coscì, seence che l Fascia aessa da perder l’ultima partida ai 26 de mé (en domenia che vegn l Fascia paussa) e l’Ozolo e la Dolasiana fajessa 6 ponc te la doi partides che ge mencia, l vantac restassa maor che 7 ponc e chest da regolament ge dèsc l met ence a la seconda en classifica de jir en Pruma Categoria zenza cogner se jièr fora i play off.

N gran suzess donca per la sozietà de balon vidèda dal president Walter Ghetta che te un soul an, se à paà jù la delujion de l’an passà.

Al triple scìgol la legreza la é duta per i jiadores de Fascia e per na Sociazion che à volù dèr seghit, ence contra a vèlch polemica, al projet pontà via l’an passà col medemo grop tecnich, olache se metea dant l crescer di joegn. Passà zenz’auter ence da la lègremes de la zeruchèda te la Seconda Categoria ma che à abù realisazion te la bela sajon de chest an.

Più avisa de la promozion e de la finèla de Copa, vegnarà scrit la setemèna che vegn.


De più su la Usc nr 19 stampèda ai 17 de mé

 (Cristoforo Debertol)