Auzala, auzala al ciel, capitan!

Data

16 de mei 2019

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
L Fascia Balon seghita a grignèr: a pec dis da la promozion en Pruma Categorìa l'é ruà ence la venta de la Copa Provinzia
Oramai la é jita, chest'outa l Fascia à perdù... nia, perché tel mond del balon l'é semper na speranza! La no é fenida fin canche la no é fenida! Bèsta nia, na trata da dalonc, na picola deviazion, na punizion, na trata de cef.

Apontin l cef, l cef de capitan Manuel Bernard al menut 93', canche mencèa dassen pech ai trei scigoi che segna la fin de la partida, ge à dat al Fascia l'oportunità de se portèr a cèsa la Copa Provinzia, n secondo suzess de gran emportanza a pec dis da la promozion en Pruma Categorìa.

Fajon n pas endò: la partida jièda angern en mercol ai 15 de mé de contra al Predaia l'era la finèla de Copa Provinzia. N travert emportant, che ge aessa dat a la squadra venjidora na copa, na copa e gran legreza.

L Fascia Balon l'é ruà a l'apuntament con l moral dalbon aut, con la legreza tel cher per la promozion arjonta acà pec dis, ma ence con gran conzentrazion e con la consapevoleza de poder aer la soramessa sui nonejes.

La partida, soraldut tel prum temp, l'à desmostrà chesta convinzion tel jech, schèji semper te man ai fascegn. L prum gol ruà, aboncont, l'é stat chel aversarie con Simone Rizzardi. N gol che à fat dut più scur e che, fin a pec seconc da la fin, à fat pissèr che nia, chest'outa l Fascia no aessa vent.

Descheche se dijea, la no é fenida fin canche la no é fenida: con gran cher, l Fascia ge à proà fin al 90' e ence più tèrt. E desche te la contìes più beles, apontin l capitan de la squadra l'é stat bon de troèr la forzes per na trata de cef che al menut 93' à segnà l'1 a 1.

Parità. E coscita inant, enscin a la trates dai 11 metres. Gol, gol e amò gol. Na fraca de goi, fin a chel segnà amò n'outa da Manuel Bernard. L fal finèl del jiador del Predaia à coscita tinultima segnà la fin, na fin doucia per nesc colores.

E donca auzala capitan "ajache anché de gra a vo aon vent duc, auzala auta perché anché l'é più bel esser fascegn, auzala capitan!"  (Daniele Verra)