La Usc di Ladins

Da ‘na setemana a r’outra no n’é mudà nuia, ‘l é restà duto conpaign, in Anpezo, par ra marescia Covid – 19: i marade i é senpre de tre. Inveze chi sarade via in ciaśa, che i é stade pede a un marà, i é de oto. Par ades se pó dì che ra và polito, pi che see canche se pensa a cuanta śente che ‘l é ruà inze ‘l paes, par ra festes de i prime dis de dezenbre; ades sarà da vede se muda algo, i dis che vien, se souta fora outre marade. Intanto par doa otes, del śoiba, ai 9 e ai 16 de dezebre, ra Ulss 1 Dolomiti e el Comun de Anpezo i s’à cordà, da śì co ‘l automobile, a se fei ra variola inze inpó el stadio Olimpico de ra jaza, par ci che aea da se fei ponśe ra prima ota e par ci che inveze ‘l é beleche a ra terza. Fin a domegna, ai 12 de dezenbre, ‘l ea da tegnì su ra mascoreta, anche de fora, a pasà par piaza; ades se pó fei demanco, ma vedaron cemodo che ra và da Nadà, se tociarà se cuerśe danoo.