“L ladin a scola? L à da dà contenteza ai tosac!”

Data

10 de fauré 2016

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Impressiogn de le prime doi leziogn del “Ladin a Scola” fate n Anpezo da la prof. Giuliana Bellodis.

Nte sti di passai la convenzion che eva stada firmada a Col l 3 de otobre passà nanter Istitut Ladin, Istitut comprensif de Cortina e l'Intendenza Ladina per portà l ladin nte le scole anpezane l'à ciapà sua derta aplicazion. Martes 26 de genaro la prof. Giuliana Bellodis l'à difati metù man sto proget nte la 1A e nte la 4C de le scòle de Anpezo. Juda n pension a la fin de l an de scola 2014/2015, la prof. l'à su le spale cotanc de agn de esperienza e proprio chesta auna a sua passion per l lingaz ladin l'à portada ad azetà sta inciaria.

Prof. Bellodis, darè n gran laor de inressida a la fin sié restada da sola a mandà navant sto proget; come elo vegnù fòra vost inom?
I me l ava domandà bele l an passà. Davant de se n jì, l dirighent de le scole Zanin l ava portà n consilio d istitut la posibilità de strenje sta convenzion per le elementari. Chilò tante clasi à demà 27 ore a la stemana inveze che 30 e la maor part de le maestre i ava dit de volé duorà l meo l temp che i ava, che l program l é tant per ogni materia e che no le vedeva saurì mete ite n ora fata per ladin. Cussì l dirighent à metù man de se vardà dintor e, nanter duc chi che l' à domandà, sonve incia mi.

Voi vegnì da na plurienal esperienza nte le scole mesane, no avevao paora de jì a insegné a chi pi picui?
A dì l vero ave pensà a sta roba ma incia che, per chel che revardava l lingaz e la cultura ampezana, sarave stade magari persone pi adatade de mi. A la fin, sebenche fosse restada da sola, ai azetà de provà.


Ce significat alo per voi l ladin a scola?
Per mi chest l é n sogno che deventa vero. Difati intor i agn 2000 ave metù man a le mejane a organizà n pico corso de ladin, cultura e tradiziogn ampezane. Nte chi agn ai bù tanta colaborazion da banda de l'ULDA e de tanta jent apassionada che vegniva a dà na man, aveve incia metù man de insegné n frego de gramatica col “Sciatul” ma po l proget l é vegnù al manco soraldut incia per la difidenza de valgune famee. No l eva saurì ie fà capi che l lingaz no l é n valch de inutile ma n patrimonio da tegnì da cont. Crede difati che incia ades, col ladin a scola, una de le robe pi difizili da fà capì ai tosac sarà proprio che l ladin l é n lingaz e non n semplize dialeto.

(Ciatarè duta l'intervista che on fat a la prof. Bellodis nte la Usc de vender 12 de febraro)



 (Giulia Tasser)